Vullneti nuk njeh moshë: 72-vjeçari pedalon 330 kilometra vetëm për të hedhur votën e tij

Pasioni për demokracinë nuk ka kufij gjeografikë dhe aq më pak moshë. Një 72-vjeçar nga Zelanda e Re ka ndërmarrë një sipërmarrje të jashtëzakonshme, duke përshkuar plot 330 kilometra me biçikletë për të ushtruar të drejtën e tij të votimit fizikisht, pasi pati vështirësi në procedurat online. Doug Habgood, i cili po shijonte një udhëtim njëjavor me biçikletë në Australi, refuzoi të heqë dorë nga detyrimi i tij qytetar, pavarësisht distancës së konsiderueshme që e ndante nga qendra e votimit. Gjatë kohës që ndodhej në qytetin rural të Narranderës, Habgood tentoi të votonte përmes internetit, por e konsideroi sistemin tepër të ndërlikuar. Kjo e shtyu pensionistin e pjesshëm nga qyteti i Nelsonit të nisej drejt Kanberës, ku ndodhej pika më e afërt e votimit. Ky rrugëtim tetëditor u shndërrua në një provë të vërtetë force e durimi. Gjatë itinerarit të tij, 72-vjeçari u ndesh me ngjitje të thepisura malore, prani të madhe mizash që i vështirësuan lëvizjen, si dhe sfida me furnizimin ushqimor, duke mbijetuar kryesisht me portokalle dhe çokollata që kishte me vete. Pasi mbërriti të martën në Komisionin e Lartë të Zelandës së Re në Kanberë, ai përmbylli me sukses misionin e tij duke votuar personalisht, një moment që e cilësoi si një ndjesi të mrekullueshme. Në një deklaratë dhënë për BBC-në, Habgood shprehu dëshirën që përvoja e tij të shërbejë si një mesazh motivimi për këdo që mund të tërhiqet nga votimet për shkak të pengesave apo burokracisë. “Unë e kam bërë detyrën time qytetare dhe nëse mendoni se është shumë e ndërlikuar ose shumë e mundimshme të votoni, atëherë shembulli im mund t’ju ndihmojë”, u shpreh 72-vjeçari.