Kryeministri Kurti viziton ekspozitën kushtuar Ismail Kadaresë dhe u bën thirrje qytetarëve ta përjetojnë nga afër

Kryeministri i Republikës së Kosovës, Albin Kurti, ka zhvilluar një takim me Besiana Kadarenë, në kuadër të hapjes së ekspozitës “Kosova e Kadaresë”, e cila është organizuar për të shënuar 90-vjetorin e lindjes së kolosit të letrave shqipe, Ismail Kadare. Gjatë këtij takimi dhe vizite, kreu i ekzekutivit theksoi se kjo ngjarje kulturore pasqyron më së miri lidhjen e pashkëputur të shkrimtarit të madh me Kosovën, si dhe ndikimin e jashtëzakonshëm të veprës së tij letrare dhe intelektuale ndër dekada. Për herë të parë në histori, familjarët dhe trashëgimtarët e autorit kanë vendosur të hapin arkivin e tij personal për publikun. Ekspozita përfshin një sërë dokumentesh të rralla, si korrespondenca me personalitete të shquara botërore, sende vetjake, dokumente nga institucione muzeale e bibliotekare, si dhe dorëshkrime origjinale. Ndër eksponatet më domethënëse spikat dorëshkrimi origjinal i ditarit të vetëm të Kadaresë, të cilin ai e shkroi gjatë periudhës së luftës në Kosovë dhe që më vonë mori dritën e botimit nën titullin “Ra ky mort e u pamë”. Vlen të theksohet se ky dorëshkrim i çmuar po shfaqet para publikut për herë të parë dhe, me këtë rast solemn, i është besuar zyrtarisht Bibliotekës Kombëtare të Kosovës për ruajtje dhe ekspozim të mëtejshëm.