E ardhmja është e qartë: Lionel Messi merr vendimin përfundimtar për karrierën e tij

Ylli argjentinas, Lionel Messi, ka vendosur përfundimisht për hapat e tij të ardhshëm në fushën e blertë. Sipas zhvillimeve më të fundit, legjenda e futbollit do të vijojë aventurën e tij me fanellën e Inter Miamit. Ish-sulmuesi i Barcelonës synon ta respektojë plotësisht marrëveshjen aktuale me skuadrën nga Shtetet e Bashkuara, e cila shtrihet të paktën deri në vitin 2028, ndërsa nuk përjashtohet mundësia e një zgjatjeje të mëtejshme të bashkëpunimit. Gjithashtu, burimet konfirmojnë se nuk ekziston asnjë bisedim apo negociatë për një rikthim të mundshëm te klubi i fëmijërisë, Newell’s Old Boys. Gazetari dhe eksperti i njohur i transferimeve, Fabrizio Romano, bëri të ditur të premten se fituesi i Topit të Artë nuk ka ndërmend të largohet nga Inter Miami, duke hedhur poshtë zërat që e dërgonin në formë huazimi te skuadra argjentinase. Romano theksoi se si Messi ashtu edhe familja e tij janë të përshtatur dhe jashtëzakonisht të lumtur në qytetin e Miamit. Vëmendja e plotë e sulmuesit mbetet te përmbushja e kontratës, ndërsa çdo vendim rreth një vazhdimësie të mundshme pas vitit 2028 do të diskutohet në një moment të dytë. Kujtojmë se në tetor të vitit 2025, drejtuesit e Inter Miamit zyrtarizuan rinovimin e kontratës me kapitenin e tyre deri në përfundim të sezonit 2028 në MLS, duke shuar kështu çdo paqartësi rreth karrierës së tij. Messi u transferua te skuadra amerikane gjatë verës së vitit 2023, pas përfundimit të angazhimit të tij me Paris Saint-Germainin. Prania e tij në Shtetet e Bashkuara solli një hov të jashtëzakonshëm të vëmendjes globale ndaj kampionatit lokal. Nën udhëheqjen e tij, klubi arriti të siguronte trofeut e parë historik: Leagues Cup në vitin 2023, si dhe Supporters’ Shield gjatë vitit 2024. Pavarësisht këtyre, spekulimet rreth një rikthimi të bujshëm te Newell’s Old Boys kishin qenë të shpeshta. Këto aludime burojnë nga lidhja e fortë shpirtërore e lojtarit me klubin e Rosarios, ku ai iu bashkua akademisë kur ishte vetëm shtatë vjeç, para se të ndërmerrte udhëtimin drejt Spanjës dhe Barcelonës në moshën 13-vjeçare.