Dardanët tregojnë karakter të frikshëm, por Italia triumfon në sekondat e fundit në Prishtinë

Kombëtarja e Kosovës në futsall është mposhtur ngushtë me rezultatin 4:3 nga Italia, në një takim tejet dramatik të zhvilluar në Pallatin e Rinisë dhe Sportit në kryeqytet, në kuadër të Grupit 10 të “Main Round”-it për kualifikimet e Kupës së Botës 2028. Edhe pse u gjendën në një disavantazh të rëndë prej tre golash (0:3), “Dardanët” dëshmuan forcë karakteri dhe shpirt luftarak në fushë. Ata realizuan një rikthim spektakolar gjatë pjesës së dytë, duke barazuar shifrat dhe duke luftuar me mish e me shpirt deri në sekondat e fundit për të siguruar një rezultat pozitiv. Megjithatë, përpjekjet e mëdha të përfaqësueses kosovare nuk u shpërblyen plotësisht, pasi italianët arritën të shënojnë golin e triumfit në çastet e fundit të takimit. Për Kosovën, protagonist u bë Ramadan Alaj me dy gola, ndërsa kontribut dha edhe Fitim Krasniqi me një gol. Në anën tjetër, suksesin për “Axurrët” e siguruan Michele Podda, Giovanni Pulvirenti, Carmelo Musumeci dhe Giuliano Fortini. Pas triumfit historik ndaj Gjeorgjisë në sfidën hapëse, Kosova mbetet në kuotën e tri pikëve, duke mbajtur vendin e dytë në grup. Italia udhëheq renditjen me gjashtë pikë, kurse Gjeorgjia mbetet ende pa pikë. Ekipi kosovar do të ketë shansin e radhës për t'u ballafaquar me italianët në ndeshjen kthyese që do të zhvillohet më 10 nëntor si mysafir, ndërsa ciklin e kësaj faze do ta mbyllë më 24 shkurt 2027, duke pritur Gjeorgjinë në Prishtinë. Vlen të theksohet se në fazën “Elite Round” kualifikohen direkt fituesit e 12 grupeve, së bashku me katër përfaqësueset më të suksesshme të vendeve të dyta. Ndërkaq, tetë skuadrat e tjera që përfundojnë në pozitën e dytë do të tentojnë biletën e kualifikimit përmes ndeshjeve të plejofit, ku gjysma e tyre do të sigurojnë kalimin tutje në raundin vendimtar.