Stil unik dhe shkëlqim në New York: Princesha Olympia rrëmben kopertinën e Vogue Scandinavia

E pagëzuar dikur nga revista prestigjioze Tatler si “personi më i lezetshëm në botë” dhe një fytyrë e përhershme në rreshtat e parë të sfilatave më të njohura ndërkombëtare, ajo e ndan kohën mes banesës së saj luksoze në New York dhe udhëtimeve anembanë globit. Bëhet fjalë for Princeshën Olympia e Greqisë dhe Danimarkës, e cila është njëherësh kumbara e mbretit Charles. Ajo ka shënuar një tjetër sukses të rëndësishëm në rrugëtimin e saj publik, duke u shndërruar në imazhin kryesor të kopertinës digjitale për edicionin e këtij muaji të revistës së njohur Vogue Scandinavia. E bija e vetme e Princit të Kurorës së Greqisë, Pavlos, dhe e bashkëshortes së tij, Marie-Chantal, ka sfiluar para objektivit me një estetikë sa elegante, aq edhe ekstravagante, duke spikatur për profilin e saj unik. Në njërën nga kuadratet fotografike, aristokratja e re shfaqet e veshur me një pallto gëzofi në tonet e gjelbër neoni, të cilën e ka kombinuar në mënyrë të guximshme me geta në ngjyrë rozë, duke konfirmuar edhe një herë shijen e saj unike për modën. Pamja e saj është kurorëzuar me flokë të kapur pas dhe një grim minimalisht natyral që nxjerr në pah tiparet e fytyrës, ndërsa të tërë vëmendjen e marrin vathët e spikatur me smeraldë dhe elementë të artë. Sesioni fotografik, i realizuar nga artisti i lentes Landon McMahon në metropolin amerikan ku Olympia ka vendosur banimin, e sjell atë duke pozuar natyrshëm me një gazetë në dorë dhe një kafe, duke reflektuar në çdo detaj ritmin dhe stilin tipik të jetesës në New York. Duke ecur pranë dritave të vitrinave, ajo shihet e veshur me një bluzë me detaje vezulluese, pantallona në ngjyrë blu dhe syze dielli me skelet transparent. Ky kombinim është plotësuar me vathë rrethorë prej ari dhe diamante, ndërsa flokët e saj bjondë lëviznin lirshëm nën fllad. Në një tjetër kuadrat që të sjell ndërmend atmosferën e serialit kult Sex and the City, princesha shfaqet duke nxituar në një vendkalim këmbësorësh në rrugët e qytetit, teksa mban fort në duar një çantë të mbushur me blerje.