Qeveria me fond të posaçëm për masivizimin e shahut në shkollat e vendit

Kryeministri Edi Rama ka bërë të ditur alokimin e një buxheti të veçantë, i cili do t'i kushtohet shtrirjes dhe zhvillimit të lojës së shahut në institucionet arsimore në mbarë Shqipërinë. Përmes një publikimi në rrjetet sociale, kreu i ekzekutivit ka ndarë sekuenca nga vizita dhe bashkëbisedimi me lojtarë të shahut nga të gjitha rajonet e vendit, gjatë qëndrimit në ambientet e Federatës Shqiptare të Shahut. Në mesazhin e tij, Rama ka nënvizuar rëndësinë e këtij sporti intelektual në formimin e brezit të ri, duke theksuar se përfshirja e tij në kurrikulat apo aktivitetet shkollore do të ndihmojë në rritjen e brezave me mendje më të mprehta. “Shahu ka shtëpinë e tij. Një hap i rëndësishëm për komunitetin shahistik dhe një mbështetje e re për shahun në shkolla, me buxhet të dedikuar për ta shtrirë në sa më shumë shkolla të vendit. Më shumë shah, më shumë mendje të mprehta”, është shprehur kryeministri.