Kreu i Atletico Madridit thyen heshtjen para duelit me Barcelonën: Çfarë tha për Alvarezin dhe Laportan

Këtë fundjavë, stadiumi “Metropolitano” do të jetë nikoqir i njërës prej sfidave më kryesore të edicionit në La Liga, ku Barcelona do të masë forcat me Atletico Madridin në një përballje me peshë specifike për garën e titullit. Për ekipin e drejtuar nga Hansi Flick, ky duel mbart një rëndësi jetike, sidomos duke pasur parasysh se në edicionin e kaluar katalanasit pësuan dy disfata nga djemtë e Diego Simeones, çka e shton presionin te miqtë për të dëshmuar potencialin e tyre të plotë. Vëmendja e opinionit sportiv do të përqendrohet gjithashtu te Julian Alvarez. Sulmuesi argjentinas, emri i të cilit u lakua gjatë verës për një kalim të mundshëm te Barcelona, do të ndeshet për herë të parë këtë sezon ndaj gjigantit katalanas. Në prag të këtij takimi, numri një i klubit madrilen, Enrique Cerezo, është pyetur rreth sulmuesit argjentinas dhe sfidës që e pret skuadrën e tij në fundjavë. Gjatë prononcimit të tij, Cerezo ka qenë tejet direkt, duke theksuar se aludimet për transferimin e Alvarezit tashmë i takojnë të shkuarës dhe se pret që sulmuesi të tundë rrjetën kundër Barcelonës. “Është një ndeshje shumë e veçantë për të, por besoj se ai tashmë ka kërkuar falje dhe ka pranuar se ka gabuar”, ka deklaruar kreu i klubit. “Tani e vetmja gjë që i mbetet të bëjë është të luajë futboll dhe të realizojë gola fanellën e Atletico Madridit”, ka shtuar më tej ai. Kujtojmë se gjatë kulmit të zhurmës mediatike rreth këtij transferimi, Cerezo kishte shprehur kritika të hapura në drejtim të Barcelonës. I pyetur nëse do t'i kthejë përgjigje presidentit Joan Laporta nëse ky i fundit e rihap temën e Alvarezit gjatë fundjavës, ai ka lëshuar një paralajmërim të qartë. “Ai do ta marrë përgjigjen e tij”, u shpreh shkurtimisht presidenti i Atletico Madridit. Për sa i përket formës, me vetëm një gol të realizuar në La Liga deri më tani, Alvarez nuk po kalon fazën e tij më të artë në Madrid, një situatë kjo e ndikuar edhe nga një nisje e ngadaltë dhe e shoqëruar me polemika. Pavarësisht kësaj, sulmuesi do të mbajë një rol kyç për skemat e trajnerit, pasi Atletico do të duhet të shfaqë durim dhe të presë çastin e duhur përballë njërës prej forcave më shkatërruese sulmuese në Evropë. Natyrisht, vendasit llogaritet të kenë më pak kohë topin në zotërim, por mundësitë e tyre do t'i kenë, dhe barra kryesore për t'i konkretizuar ato do të bie pikërisht mbi supet e argjentinasit. Në aksionet e rrezikshme në repartin e avancuar, lojtari do të mbështetet nga bashkëlojtarë të tjerë të rëndësishëm si Alex Baena dhe Alexander Sorloth.