Incident i pazakontë në Angli: Policia ndalon mbrojtësin e Newcastle, Amar Dedic, i pajisur me hark dhe shigjeta

Mbrojtësi i Newcastle United, Amar Dedic, është bërë protagonist i një ngjarjeje të papritur, pasi është ndaluar nga autoritetet policore në rajonin e Northumberland, teksa po transportonte një hark dhe shigjeta. Reprezentuesi i Bosnjë-Hercegovinës po lëvizte në shoqërinë e një miku të tij në momentin kur u interceptua nga forcat e rendit. Sipas burimeve zyrtare, aksioni për ndalimin e tyre mobilizoi gjashtë automjete policore, përfshirë edhe njësi të armatosura, të cilët arritën t'i bllokonin rrugën rreth shtatë milje larg pikës ku ishin diktuar fillimisht. Gjatë kontrollit të detajuar të automjetit, efektivët bënë sekuestrimin e mjeteve harkëtare, megjithatë autoritetet konfirmuan se pas verifikimeve të nevojshme u bindën plotësisht se dy personat nuk paraqitnin asnjë lloj rreziku për sigurinë publike. Në vendin e ngjarjes janë shfaqur papritur edhe portieri i Newcastle, 34-vjeçari Mark Gillespie, si dhe ish-mbrojtësi Paul Dummett, 35 vjeç. Të dy ata ndodheshin rastësisht pranë zonës dhe u ndalën për t'i dalë në ndihmë kolegut të lor. Ngjarja ka ndodhur gjatë ditës së mërkurë, vetëm 48 orë pasi Dedic ishte aktivizuar në sfidën ku skuadra e tij u mposht minimalisht 1-0 në shtëpi nga Evertoni. Aktualisht, klubi i Newcastle United, i cili renditet në vendin e 13-të të Premier League me 11 pikë të grumbulluara nga nëntë ndeshje, ka zgjedhur të mos japë asnjë koment zyrtar. Ndërkohë, Policia e Northumberland ka lëshuar një komunikatë për media, duke theksuar se hetimet rreth këtij rasti janë ende të hapura.