Ministrja Bogujevci pritje të ngrohtë për dyshen fituese të “Akordeve të Kosovës 2026”

Ministrja e Kulturës dhe Turizmit, Saranda Bogujevci, ka zhvilluar një takim zyrtar me Troja Bicurrin dhe Dalina Haxhiun, të cilat u shpallën fituese të edicionit 2026 të Festivalit të Këngës “Akordet e Kosovës”. Në këtë pritje morën pjesë gjithashtu drejtoresha e përgjithshme e RTK-së, Zana Spahiu, si dhe drejtoresha e festivalit, Arta Avdiu, me të cilat u shkëmbyen mendime rreth mbarëvajtjes së këtij viti dhe planeve për të ardhmen e këtij eventi muzikor. Gjatë bisedës, shefja e dikasterit të Kulturës u njoh nga afër me përshtypjet, sfidat e përgatitjeve dhe emocionet e përjetuara nga artistet e reja gjatë paraqitjes së tyre në skenë. “Me kënaqësi i prita sot në takim Troja Bicurrin dhe Dalina Haxhiun, fitueset e Festivalit të Këngës ‘Akordet e Kosovës’ 2026”, ka shkruar Bogujevci. Sipas njoftimit të ministres, takimi shërbeu edhe për një analizë të përmbyllur të organizimit dhe angazhimit të treguar për edicionin aktual, duke hedhur dritë edhe mbi hapat e ardhshëm për garantimin e jetëgjatësisë së festivalit. “Bashkë me drejtoreshën e RTK-së, Zana Spahiu, dhe drejtoreshën e festivalit, Arta Avdiu, diskutuam për organizimin dhe punën e bërë në edicionin e sivjetmë, si dhe për vazhdimësinë e ‘Akordeve të Kosovës’ në vitet e ardhshme”, ka theksuar ajo. Në mbyllje të takimit, Bogujevci ka përcjellë urimet e saj më të sinqerta për talentet e reja, duke u dëshiruar ecuri të mbarë dhe suksese të mëtejshme në skenat e muzikës. “I urova Trojës dhe Dalinës shumë suksese të tjera në rrugëtimin e tyre muzikor”, ka shkruar ministrja.