Gëzim dhe krenari familjare: Gjenerata më e re e Policisë së Kosovës kurorëzon suksesin

Kryeqyteti ka mirëpritur sot ceremoninë zyrtare të diplomimit të gjeneratës së 63-të të kadetëve të Policisë së Kosovës. Pas një periudhe intensive të përgatitjes profesionale, këta të rinj janë gati të nisin rrugëtimin e tyre në shërbim të institucionit të sigurisë. Atmosfera në këtë ngjarje është shoqëruar me ndjenja të thella mallëngjimi dhe krenarie nga ana e familjarëve, të cilët kanë ndarë gëzimin për suksesin e më të afërmve të tyre dhe kanë vlerësuar lart angazhimin e përditshëm të forcave të rendit në vend. Ndër pjesëmarrkit ishin edhe Florian Kolgeci dhe Artiol Pajaziti, dy prej kadetëve të rinj, familjet e të cilëve kanë shprehur hapur emocionet e tyre për këtë hap të rëndësishëm në karrierën e djemve të tyre. Duke ndarë përshtypjet për ceremoninë, vëllai i Florian Kolgecit ka vënë inë pah rëndësinë e kësaj dite, duke e cilësuar atë si një mision nderi për t'i shërbyer atdheut. “Sot është diplomuar vëllai i vogël, Florian Kolgeci. Është një kënaqësi e veçantë dhe krenari e madhe që do t’i shërbejë Republikës së Kosovës. Ka qenë sfidë për ta, por edhe mësim. Uroj dhe shpresoj që Policia e Kosovës të jetë dhe të mbetet njëra ndër policitë më të mira në Ballkan dhe besoj që kjo gjeneratë do ta bëjë shtetin e Kosovës krenar, me meritat dhe punën e vet, shumë të suksesshme”, ka deklaruar ai. Në të njëjtën linjë kanë qenë edhe përshtypjet nga familja e Artiol Pajazitit, të cilët kanë ndalur theksin te niveli i lartë i përgatitjes që kadetët kanë marrë përgjatë trajnimit të tyre. “Nga familja ime sot ka diplomuar Artiol Pajaziti. Me të vërtetë është një emocion shumë i madh. E përgëzoj këtë përgatitje profesionale, të cilën e ka dhënë i gjithë ekipi profesional i Policisë së Kosovës, për përgatitjen e tyre fizike, psikike, mendore dhe në çdo lëmi”, u shpreh familjari i tij. Ndërkaq, një histori tjetër prekëse ka ardhur nga një prind, ëndtërr e të cilit për t'u bërë pjesë e policisë është realizuar tashmë nga e bija e tij. “Unë, si prind i saj, e kam pasur ëndërr këtë punë, por nuk pata mundësi unë ta arrija në atë kohë. Vajza e ka vazhduar këtë drejtim dhe shpresoj vetëm suksese për të gjithë. Ka qenë shumë e angazhuar, por ia ka dalë, ia ka dalë 100%”, tha ai. Kujtojmë se kjo gjeneratë përbëhet nga rreth 400 pjesëtarë të rinj, ku spikat prania e 118 vajzave dhe grave. Ky kontingjent i ri i kadetëve zyrtarisht i shtohet radhëve të Policisë së Kosovës, duke marrë mbi vete barrën e garantimit të rendit, sigurisë publike dhe zbatimit të ligjit në mbarë vendin.