Zvarritet procesi gjyqësor për “Lotarinë Shtetërore”, catohet data e re për seancën

Gjykata Themelore Penale në Shkup ka marrë vendim për shtyrjen e seancës gjyqësore lidhur me rastin e njohur si “Lotaria Shtetërore”, e cila ishte paraparë të zhvillohej sot. Palët ndërgjyqëse dhe trupi gjykues do të takohen sërish më 11 nëntor, datë kjo kur është caktuar vazhdimi i gjykimit. Në këtë proces gjyqësor, lista e të pandehurve përfshin ish-zëvendëskryeministrin e parë, Artan Grubi, ish-drejtorin e “Lotarisë Shtetërore”, Përparim Bajrami, si dhe gjashtë persona të tjerë të përfshirë në këtë çështje. Seanca e fundit e kësaj çështjeje u zhvillua më 30 tetor, ku në cilësinë e dëshmitarit u paraqit Andrej Krstevski, këshilltar për zbatimin e projekteve në këtë ndërmarrje, i cili më parë ka mbajtur pozitat e anëtarit të Bordit Drejtues dhe Mbikëqyrës, si dhe zëvendësdrejtorit. Gjatë dëshmisë së tij, ai foli për mekanizmat e vendimmarrjes brenda kompanisë publike dhe për ecurinë e procedurave që kishin të bënin me blerjen e terminaleve VLT. Duke iu përgjigjur pyetjeve të ngritura nga organet e akuzës rreth tenderit për terminalet VLT, dëshmitari tha se për këtë nismë ishte vënë në dijeni personalisht nga Bajrami. Ai shtoi gjithashtu se kishte marrë informacione për detajet e procedurës menjëherë pas përmbylljes së saj, përmes personave që kishin qenë pjesë e komisioneve përgjegjëse për zbatimin e tyre. Në zhvillimet e tjera lidhur me këtë rast, më 3 nëntor, Këshilli Penal pranë Gjykatës Penale në Shkup vendosi t'i ndryshojë masën e sigurisë Përparim Bajramit, duke ia hequr paraburgimin pasi u pranua një garanci pasurore në paluajtshmëri prej 1.140.781 eurosh. Krahas kësaj garancie, ndaj tij u caktuan edhe masa plotësuese, duke përfshirë marrjen e pasaportës dhe detyrimin për t'u paraqitur rregullisht në gjykatë. Përveç Grubit dhe Bajramit, në këtë dosje penale figurojnë edhe emrat e Bashkim Avdiut, Metodija Dimovskit, Skender Mehmetit, Bojan Janevit, Fatmir Ramadanovskit dhe Aleksandar Dimitrioskit. Sipas pretendimeve në aktakuzë, të pandehurit duke shpërdoruar detyrën dhe kompetencat e tyre zyrtare, i kanë sjellë dëm financiar “Lotarisë Shtetërore” në vlerë prej 596.125.511 denarësh. Gjatë paraqitjeve të tyre në gjykatë deri më tani, të gjithë të akuzuarit janë deklaruar të pafajshëm për akuzat që u rëndojnë. Interesat e akuzës në këtë proces po i mbrojnë prokurorët publikë Daniel Kocev dhe Aleksandar Davçevski, ndërsa drejtimi i seancave gjyqësore i është besuar gjykatëses Biljana Shuplinovska-Jovevski.