Ministrja Janevska: Komisioni Evropian konfirmon hapat para dhe suksesin e reformave në arsim

Përparimi i arsimit dhe shkencës në vend ka marrë vlerësime pozitive nga Bashkimi Evropian, duke shënuar një kthesë të rëndësishme nga situata sfiduese e viteve të kaluara. Ky konstatim u bë i ditur nga ministrja e Arsimit dhe Shkencës, Vesna Janevska, gjatë fjalës së saj në panelin e diskutimit të mbajtur në Qeveri me titull "Raporti i Komisionit Evropian për vitin 2026 - Progresi dhe Reformat". Sipas saj, ndalimi i rënies së lirë të sistemit arsimor dhe kthimi i tij në një shtyllë të fortë shtetërore tashmë është një realitet i prekshëm që pasqyrohet qartë në dokumentet evropiane. Janevska vuri në dukje se raporti dëshmon rezultate konkrete dhe tendenca pozitive në disa sektorë kyçë të dijes. Ajo veçoi përmirësimin e kornizës ligjore dhe strategjike, zgjerimin e infrastrukturës së qendrave rajonale për arsim profesional, përfshirjen më të madhe të të rinjve në profile profesionale, si dhe intensifikimin e bashkëpunimit me sektorin e biznesit. Po ashtu, ministrja përmendi avancimin e sistemit të validimit, fuqizimin e qasjes gjithëpërfshirëse dhe procesin e dixhitalizimit në shkolla. Duke folur për hapat konkretë institucionalë, ministrja theksoi se janë miratuar dokumentet vendimtare që garantojnë zbatimin e reformave. Ajo veçoi Strategjinë e Arsimit 2026-2032 dhe Strategjinë për Specializim të Mençur, të cilat luajnë rol kryesor në zhvillimin ekonomik, duke shtuar se zbatimi i objektivave po ecën me ritme të shpejta. Sipas saj, mbi 75 për qind e planit të ri të veprimit tashmë është realizuar me sukses. Në fushën e aftësimit të të rriturve, ajo theksoi rëndësinë e Ligjit të ri për Arsimin e të Rriturve, i cili ka vendosur themelet e një sistemi të të mësuarit gjatë gjithë jetës. Janevska konfirmoi se Qendra e Arsimit të të Rriturve tashmë po funksionon në mënyrë optimale, duke e kthyer vizionin e dikurshëm në një shërbim funksional për qytetarët. Në fund, ministrja ofroi të dhëna konkrete për arsimin profesional, duke bërë të ditur se mbi 70 për qind e nxënësve të shkollave të mesme zgjedhin profile profesionale, ndërsa një e treta e tyre ndjekin mësimin e kombinuar, ku teoria ndërthuret me praktikën direkt te punëdhënësit. Ajo përfundoi duke bërë të ditur se numri i kompanive partnerë ka kaluar shifrën 1,000, ndërsa tetë qendra rajonale tashmë janë plotësisht funksionale në shërbim të nxënësve.