Dita e 121-të e rezistencës: Qytetarët marshojnë drejt Kryeministrisë kundër projekteve në Zvërnec

Vala e protestave kundër projektit turistik në Zvërnec ka hyrë në ditën e saj të 121-të. Edhe këtë të martë, qytetarët janë mbledhur në sheshin “Skënderbej” në kryeqytet, për t’u zhvendosur më pas në një marshim proteste drejt ndërtesës së Kryeministrisë. Me pankarta në duar dhe kërkesa të qarta, pjesëmarrësit përshkuan bulevardin “Dëshmorët e Kombit”, duke shprehur kundërshtinë e tyre ndaj politikave qeveritare për zonat e mbrojtura dhe ligjin për investimet strategjike. Përgjatë tubimit, protestuesit kanë artikuluar kërkesën për dorëheqjen e kryeministrit Edi Rama, duke bërë thirrje për një ndryshim rrënjësor të asaj që ata e cilësuan si “kasta e vjetër politike”. Në podiumin e ngritur përpara Kryeministrisë, pedagogu Lush Susaj u drejtoi një thirrje të hapur qytetarëve nga të gjitha shtresat shoqërore, me fokus të veçantë te fermerët. “I bëj thirrje çdo shqiptari të bashkohet, sepse pjesëmarrja në këtë protestë është vlerë. Si profesor i teknologjive bujqësore, u drejtohem fshatarëve: jeni shtresa më e shtypur e shoqërisë. Fermerët duhet të ndërgjegjësohen se, ndërsa në vendet e tjera subvencionet po jepen që nga muaji mars, këtu situata është krejt ndryshe”, deklaroi Susaj. Ndërkohë, aktivistja Sidorela Vatnikaj e përqendroi fjalën e saj te zhvillimet e fundit politike dhe skandalet që kanë përfshirë institucionet. Ajo kritikoi ashpër heshtjen e Presidentit të Republikës, duke iu referuar raportimeve për drejtuesen e SHISH. Sipas saj, përpjekja e kreut të shtetit për ta trajtuar këtë çështje si një ngjarje personale është e papranueshme, duke nënvizuar se institucioni i Presidencës ka qëndruar indiferent gjatë gjithë këtyre muajve të protestave dhe viteve të qeverisjes. Kjo lëvizje qytetare, e cila ka nisur më 31 maj, vazhdon të mbajë gjallë një platformë kërkesash që përfshijnë anulimin e ndryshimeve ligjore për zonat e mbrojtura, shfuqizimin e të ashtuquajturës “Paketë e Maleve”, si dhe largimin e klasës aktuale politike nga drejtimi i vendit.