Forcat e rendit shtohen me 397 efektivë të rinj, 118 prej tyre janë gra

Përmes një ceremonie solemne është kurorëzuar suksesshëm përgatitja dhe trajnimi profesional i gjeneratës së 63-të të Policisë së Kosovës, duke i hapur rrugë integrimit të kadetëve të rinj në strukturat e sigurisë së vendit. Ky zhvillim u cilësua si një moment kyç në misionin e tyre për të garantuar rendin publik, sigurinë qytetare dhe zbatimin e plotë të ligjit në tërë territorin e Republikës së Kosovës. E pranishme në këtë ngjarje, kryetarja e Kuvendit të Kosovës, Albulena Haxhiu, vuri theksin te rëndësia historike që mbart ky institucion dhe pesha e përgjegjësisë që mbajnë mbi supe pjesëtarët e tij në mbrojtje të qytetarëve. Haxhiu: Ju po hyni në një institucion që ka një vend të veçantë në historinë tonë të re “Ju po hyni në një institucion që ka një vend të veçantë në historinë tonë të re. Policia e Kosovës u themelua në vitin 1999, menjëherë pas përfundimit të luftës, në kohën kur vendi ynë po niste ndërtimin e institucioneve të veta. Nga një shërbim policor i sapokrijuar, ajo u zhvillua në një institucion të rëndësishëm të Kosovës, duke marrë përsipër përgjegjësinë për rendin, sigurinë dhe më pas edhe për mbrojtjen e sovranitetit të vendit”, u shpreh Haxhiu. Gjatë fjalës së saj, ajo kujtoi me nderim edhe dëshmorët e Policisë së Kosovës që humbën jetën në krye të detyrës, duke përmendur posaçërisht Enver Zyberin, Afrim Bunjakun dhe të gjithë efektivët e rënë në shërbim të atdheut. Kryetarja e Kuvendit u adresua kadetëve të rinj edhe me një thirrje për guxim moral, integritet profesional dhe ndërgjegjësim të lartë gjatë ushtrimit të detyrës zyrtare. Haxhiu: Guximi i policit dëshmohet edhe kur duhet të mbrojë ligjin përballë të fuqishmëve “Guximi i një polici nuk dëshmohet vetëm në përballje me rrezikun. Guxim është edhe të veprosh drejt kur është më e lehtë të heshtësh, të mbrosh të dobëtin edhe kur përballë ke dikë të fuqishëm, si dhe të mbrosh ligjin edhe kur shkelja e tij vjen nga dikush që e njeh”, theksoi ajo. Duke iu referuar përbërjes gjinore, Haxhiu bëri të ditur se mes të diplomuarve janë edhe 118 vajza dhe gra, një statistikë kjo që dëshmon ndryshime pozitive në institucionet e sigurisë. Haxhiu: 118 vajza e gra në Policinë e Kosovës, thirrje për mbrojtje më serioze të viktimave të dhunës “Në mesin tuaj janë 118 vajza dhe gra. Dua t’ju përgëzoj për këtë zgjedhje. Prania e më shumë grave në institucionet e sigurisë është një zhvillim i rëndësishëm për vendin tonë. Derisa shumë gra po marrin përgjegjësi për sigurinë e të tjerëve, shumë gra të tjera vazhdojnë të jetojnë nën kërcënimin e dhunës, fatkeqësisht edhe brenda shtëpive të tyre. Për shumë prej tyre, vendimi për ta denoncuar dhunën vjen pas një historie të gjatë kërcënimesh, kontrolli dhe frike. Ato e dinë se ekspozimi mund t’i vërë përballë një rreziku edhe më të madh. Prandaj, kur një grua u drejtohet institucioneve, rreziku duhet të vlerësohet me seriozitet dhe masat për mbrojtjen e saj duhet të ndërmerren me kohë”, u shpreh ajo. Në të njëjtën linjë fjalimi u pozicionua edhe kryeministri Albin Kurti, i cili e cilësoi si një zhvillim jashtëzakonisht pozitiv përfshirjen e lartë të gjinisë femërore në këtë gjeneratë. Kurti: Lajm i mirë që edhe në këtë gjeneratë gratë po diplomohen në numër të konsiderueshëm “Në këtë Gjeneratë të 63-të po diplomoni gjithsej 397 kadetë, prej tyre 118 gra dhe 279 burra. Pra, pothuajse çdo i treti pjesëtar është grua. Është lajm i mirë që edhe në këtë gjeneratë gratë po diplomohen në numër të konsiderueshëm. Nga momenti i betimit, secili prej jush do të jetë i gatshëm të punojë në interes të shtetit”.