Fjalë prekëse nga Kurti për djemtë e heronjve Bunjaku e Zymberi: Shteti do të jetë gjithmonë krah jush

Kryeministri i Republikës së Kosovës, Albin Kurti, ka shprehur emocione të veçanta gjatë ceremonisë së diplomimit të gjeneratës së 63-të të Policisë së Kosovës, duke veçuar praninë e djemve të dy dëshmorëve të atdheut, Enver Zymberi dhe Afrim Bunjaku, të cilët tashmë janë bërë pjesë e forcave të rendit. Kreu i ekzekutivit theksoi se pasardhësit e heronjve, duke e hedhur hapin e parë në këtë profesion fisnik, po ndjekin rrugën e lavdishme të prindërve të tyre për të garantuar zbatimin e ligjit dhe mbrojtjen e rendit kushtetues në vend. "Mes jush gjenden edhe dy djemtë e heronjve tanë, Sokol Zymberi dhe Jetlum Bunjaku", u shpreh kryeministri para kadetëve të rinj. Duke vënë theksin te rëndësia e këtyre angazhimeve, Kurti shtoi se vetëm në këtë mënyrë konsolidohet shtetësia dhe garantohet një ambient i sigurt dhe paqësor për të gjithë qytetarët pa dallim. "Në gjurmët e prindërve të tyre, ata do të vazhdojnë angazhimin në ruajtjen e rendit dhe zbatimin e ligjit, sepse vetëm kësisoj e fuqizojmë Republikën e Kosovës, si dhe sigurinë dhe paqen për të gjithë", u shpreh ai. Në fjalën e tij, shefi i qeverisë garantoi mbështetje të plotë institucionale për strukturat policore, duke kujtuar se përkushtimi ndaj këtij dikasteri është ngritur në standarde dukshëm më të larta krahasuar me të kaluarën. "Qeverinë tonë do ta keni përherë përkrah. Mbështetjen për Policinë e Kosovës e kemi dëshmuar vazhdimisht, në nivel shumë më të lartë dhe të pakrahasueshëm me periudhat e mëparshme", përfundoi Kurti.