Gërvalla bisedon në Budva me komisionerin McGrath: Theksi te reforma në drejtësi dhe Byroja Shtetërore

Ministrja e Punëve të Jashtme dhe Diasporës, Donika Gërvalla, ka zhvilluar një takim me Komisionerin Evropian për Demokraci, Drejtësi, Sundimin e Ligjit dhe Mbrojtjen e Konsumatorëve, Michael McGrath. Takimi është mbajtur në kuadër të Forumit Ministror BE–Ballkani Perëndimor për Drejtësi, i cili po zhvillon punimet e tij në Budva të Malit të Zi. Përmes një njoftimi në rrjetet sociale, Gërvalla ka treguar se në fokus të bisedës me zyrtarin e lartë evropian kanë qenë synimet e Kosovës në sektorin e drejtësisë, partneriteti me Bashkimin Evropian, si dhe hapat e bërë drejt procesit të integrimit evropian. Palët i kanë kushtuar vëmendje të veçantë reformave në gjyqësor, me theks të posaçëm te themelimi dhe funksionalizimi i plotë i Byrosë Shtetërore, një mekanizëm që sipas shefes së diplomacisë kosovare po pritet me interesim të madh nga qytetarët për të siguruar se pasuria e pajustifikueshme nuk mund të mbulohet nga pushteti. Gjatë diskutimeve, kryediplomatja kosovare ka vënë në dukje se zbatimi i pakos së ligjeve për reformën më të thellë në drejtësi synon të transformojë rrënjësisht sistemin gjyqësor në vend, duke shtuar se pavarësia e gjyqësorit përbën shtyllën kurrizore të shtetit ligjor, por ajo nuk duhet të përdoret kurrë si mburojë nga personat e përfshirë në korrupsion dhe krim. Në përfundim të takimit, Gërvalla ka theksuar se reformat rrënjësore mbeten parakusht i panegociueshëm për një shtet funksional, ndërsa Kosova po vazhdon rrugëtimin e saj me vendosmëri për të forcuar mekanizmat e drejtësisë dhe për të garantuar një rrugë të pakthyeshme drejt Bashkimit Evropian.