Liga e Kombeve 2027: Zvicra zbulon kalendarin e ndeshjeve, nis rrugëtimin ndaj Irlandës dhe sfidon Spanjën

Është bërë publik kalendari zyrtar për edicionin e ri të Ligës së Kombeve në futboll për femra, ku Përfaqësuesja e Zvicrës tashmë i ka sytë nga sfida e parë e këtij kompeticioni. Vajzat helvetike do ta startojnë fushatën e tyre në Grupin 1 të Ligës A më 2 mars, duke udhëtuar për t'u ballafaquar me kombëtaren e Irlandës në cilësinë e mysafireve. Vetëm katër ditë më vonë, më 6 mars, grupi i lojtareve të udhëhequra nga trajneri Rafel Navarro do të presë në shtëpi kampionet në fuqi të botës, Spanjën, në një nga ndeshjet më interesante të kësaj faze. Më 20 prill, zviceranet do të zhvillojnë një tjetër ndeshje jashtë fushës së tyre, kësaj radhe kundër Norvegjisë, ndërsa më 24 prill do të kthehen para shikuesve të tyre për të pritur Irlandën në takimin e kthimit. E gjithë faza e grupeve do të hyjë në epilogun e saj gjatë muajit qershor. Më 11 qershor, Zvicra do të jetë nikoqire e Norvegjisë, kurse më 15 qershor do të mbyllë këtë cikël me një udhëtim të vështirë për t'u përballur me Spanjën. Në fund të këtij edicioni, katër skuadrat që do të dalin fituese të grupeve përkatëse do të kenë mundësinë të garojnë për trofeun e lakmuar të Ligës së Kombeve. Përveç ambicieve të larta, synimi kryesor i Kombëtares së Zvicrës në këtë edicion mbetet ruajtja e statusit dhe sigurimi i qëndrimit në elitë, respektivisht në Ligën A.