Kriza e uniformave në Polici, Kurti: Buxheti dhe mbështetja shtetërore janë në nivele rekord

Kryeministri i Kosovës, Albin Kurti, ka shmangur një përgjigje direkte lidhur me shqetësimet rreth mungesës së uniformave dhe pajisjeve logjistike për pjesëtarët e Policisë së Kosovës. Kjo deklaratë vjen pikërisht në ditën kur mbi 300 kadetë të rinj të gjeneratës së 63-të bëhen gati të sistemohen në radhët e këtij institucioni të sigurisë. I interpeluar nga gazetarët gjatë ditës së premte rreth kësaj teme, kreu i ekzekutivit sqaroi se kompetenca për t'u përgjigjur mbi çështjet e prokurimit, furnizimit dhe inventarit i takon ekskluzivisht Ministrisë së Punëve të Brendshme. Megjithatë, Kurti vuri theksin te mbështetja financiare, duke pohuar se ndarjet buxhetore për Policinë e Kosovës kanë shënuar rritje të vazhdueshme. Ai shtoi se qeverisja aktuale i ka siguruar institucionit të rendit dhe sigurisë kujdesin më të lartë shtetëror se kurrë më parë. "Unë tash do të shkoj atje dhe natyrisht është një arritje e re që Republikës së Kosovës po i shtohen edhe mbi 300 kadetë të rinj, nga të cilët rreth 30% janë gra. Sa i përket furnizimit me pajisje, me uniforma, është Ministria e Punëve të Brendshme që mund t’ua jep përgjigjen e duhur mbi atë se si shkojnë proceset, por buxheti për Policinë e Kosovës është rritur vazhdimisht dhe kurrë nuk ka pasur më shumë kujdes shtetëror e qeveritar për policinë, ushtrinë, oficerin dhe uniformën sikurse tani", u shpreh ai gjatë një prononcimi për mediat pas vizitës në Institutin e Krimeve të kryera gjatë luftës në Kosovë. Ndryshe, ceremonia zyrtare për diplomimin e gjeneratës së 63-të të Policisë së Kosovës është planifikuar të zhvillohet gjatë pasdites së sotme.