Kriza kaplon Sunderlandin e Granit Xhakës: Nga përralla e sezonit të kaluar te rënia e frikshme në formë

Kapiteni Granit Xhaka dhe skuadra e Sunderlandit kanë kaluar një mbrëmje mjaft të hidhur, pasi u mposhtën në stadiumin e tyre me rezultatin 0:2 nga Dinamo e Zagrebit, në kuadër të xhiros së katërt të Ligës së Evropës. Ky ishte një rezultat i vështirë për t'u përtypur, veçanërisht duke pasur parasysh faktin se anglezët hynë në këtë takim si favoritë përballë kundërshtarit kroat. Analistët sportivë vlerësojnë se periudha e artë tashmë i përket së kaluarës dhe se klubi po kalon një fazë tejet sfiduese. Shenjat e krizës, që fillimisht u shfaqën në kampionatin vendor, tashmë janë reflektuar dukshëm edhe në skenën ndërkombëtare, duke ngritur shqetësime serioze për ecurinë e mëtutjeshme. Që nga transmetimi i dokumentarit të njohur të Netflix-it, "Sunderland 'Til I Die", është bërë e qartë se pasioni dhe përkushtimi i tifozëve besnikë nuk varen kurrë nga kategoria ku luan skuadra. Megjithatë, do të ishte një zhgënjim i madh nëse "Macet e Zeza" do të rrezikonin një rikthim në divizionin e dytë, sidomos pas suksesit përrallor që shënuan gjatë edicionit të kaluar. Si një skuadër e ngjitur rishtazi në elitë, klubi nga qyteti portual në verilindje të Anglisë bëri bujë të madhe në sezonin 2025/26. Nën udhëheqjen e spikatur të Granit Xhakës, Sunderlandi arriti një pozicionim sensacional në vendin e shtatë në Premierligë, duke siguruar kështu një biletë për në garat evropiane pas plot 53 vitesh pritje. Nëse edicioni i kaluar ishte thjesht i jashtëzakonshëm, realiteti aktual është krejtësisht ndryshe dhe mjaft alarmant. Statisikat tregojnë se nga gjashtë duelet e fundit në të gjitha garat, ekipi ka regjistruar vetëm një fitore të vetme. Në fashën e parë të këtij sezoni, djemtë e drejtuar nga trajneri Régis Le Bris gjetën një lloj qetësie në Ligën e Evropës, duke u shkëputur nga rezultatet zhgënjyese në Premierligë, ku kishin arkëtuar shtatë pikë nga tri sfidat e para. Mirëpo, mbrëmja e së enjtes në "Stadium of Light" dëshmoi se rënia e formës ka prekur tashmë edhe arenën evropiane, pavarësisht se, falë startit të mbarë, shanset për kualifikim mbeten ende të hapura. Më shqetësues se humbja ndaj kroatëve mbetet frenimi i përgjithshëm i skuadrës. Përveç një triumfi të vetëm në Kupën e Ligës, Sunderlandi po lëngon në kampionat, ku fitorja e fundit daton që nga xhiroja e dytë, pra para më shumë se dy muajsh. Në shtatë ndeshjet e fundit kampionale, Xhaka me shokë kanë siguruar vetëm dy pikë. Si pasojë e kësaj ecurie, pas nëntë javësh lojë, skuadra mbyll tabelën me vetëm pesë pikë në llogari, ndërkohë që në të njëjtën periudhë të vitit të kaluar kishte grumbulluar plot 17 pikë. Për ta ilustruar këtë rënie, mjafton të shohim pesë takimet e fundit në Premierligë: ndaj Manchester Cityt (3:5), Brightonit (0:2), Bournemouthit (0:2), Leedsit (0:0) dhe Coventry Cityt (1:3). Të dielën në mbrëmje, Sunderlandi do të presë Chelsean, ekipin që deri më tani ka treguar efikasitetin më të lartë në sulm në të gjithë kampionatin. Për t'i ikur fundit të tabelës para ndërprerjes për ndeshjet e kombëtareve, do të duhet një mrekulli e vërtetë, edhe pse një fije shprese mbetet te fakti se në edicionin 2025/26, "Macet e Zeza" arritën t'i rrëmbenin Chelseat të gjashtë pikët e plota nga dy përballjet direkte.