Brukseli lëshon alarmin: Qytetarët të pajisen me rezerva ushqimore dhe ujë për të paktën 72 orë

Komisioni Evropian ka ndërmarrë një hap të ri, duke publikuar udhëzime zyrtare për banorët e vendeve anëtare me qëllim rritjen e gatishmërisë përballë fatkeqësive natyrore dhe skenarëve emergjentë, siç janë ndërprerjet e energjisë, sulmet kibernetike dhe krizat e ndryshme. Sipas këtyre rekomandimeve të reja, çdo vatër familjare këshillohet të krijojë rezerva të mjaftueshme me ushqim, ujë të pijshëm dhe artikuj parësorë, të cilat mbulojnë nevojat për të paktën 72 orët e para të një incidenti, periudhë kjo kritike deri në ndërhyrjen e strukturave të shpëtimit. Këto udhëzime u bënë publike gjatë punimeve të Forumit Evropian për Mbrojtjen Civile në kryeqytetin belg nga komisionerja për menaxhimin e krizave, Hadja Lahbib, e cila vuri në dukje se orët e para mbeten vendimtare dhe çdo individ duhet të dijë si të sigurojë familjen dhe komunitetin. Ajo shtoi se ky proces nis pikërisht nga vatrat familjare, institucionet arsimore dhe zonat lokale, duke sugjeruar gjithashtu përgatitjen e një çante të veçantë evakuimi për raste urgjente. Përveç sigurimit të ushqimit dhe ujit për tri ditë, paketa parashikon edukimin e fëmijëve në kopshte dhe shkolla përmes metodave të përshtatura për moshat e tyre, mbrojtjen e personave me nevoja të veçanta, si dhe një komunikim më efikas nga institucionet. Në kuadër të këtyre masave, Komisioni Evropian ka hedhur idenë që data 23 tetor të kthehet në Ditën Evropiane të Gatishmërisë, duke nisur nga viti 2027, për të kujtuar themelimin e Mekanizmit Evropian të Mbrojtjes Civile më 2001. Propozimi ka marrë mbështetjen e një paneli prej 150 qytetarësh nga mbarë blloku evropian, të cilët kanë kërkuar një përfshirje më aktive të shoqërisë në skemat e shpëtimit dhe mbrojtjes. Ndërkohë, autoritetet në Bruksel u kanë kërkuar shteteve anëtare që të kryejnë rregullisht simulime dhe të hartojnë plane të qëndrueshme operacionale për situata të jashtëzakonshme. Qendrat kombëtare të mbrojtjes civile duhet të garantojnë punë pa ndërprerje, 24 orë në shtatë ditë të javës, pavarësisht goditjeve në rrjetet energjetike, të komunikimit apo sulmeve kibernetike. Edhe pse këto udhëzime nuk kanë karakter të detyrueshëm ligjor, ato përbëjnë një shtyllë të rëndësishme të strategjisë së BE-së për të përballuar sfidat e ardhshme. Kjo qasje mbështetet në gjetjet e raportit të ish-presidentit finlandez Sauli Niinistö, i cili paralajmëroi se Europa, për shkak të ndryshimeve klimatike dhe tensioneve gjeopolitike, duhet të ndërtojë një kulturë të mirëfilltë gatishmërie në çdo shtresë të shoqërisë.