Tragjedi në Vlorë: Humb jetën gjatë detyrës 50-vjeçari, goditet nga rryma elektrike në Kocul

Një ngjarje e rëndë ka tronditur sektorin e energjisë, ku një punonjës i Drejtorisë së Tensionit të Lartë ka ndërruar jetë pasi është përshkuar nga rryma elektrike teksa po ushtronte detyrën e tij në qytetin e Vlorës. Viktimë e këtij aksidenti tragjik në punë ka mbetur 50-vjeçari Altin Petanaj. Ai po punonte së bashku me kolegët e tij për riparimin e defekteve në nënstacionin elektrik të fshatit Kocul, moment ky kur ka ndodhur edhe goditja fatale. Menjëherë pas marrjes së njoftimit, strukturat vendore të policisë kanë mbërritur në vendngjarje. Ato kanë nisur procedurat hetimore për të dokumentuar plotësisht ngjarjen dhe për të hedhur dritë mbi rrethanat e sakta në të cilat u shua jeta e punonjësit. Grupi hetimor pritet të analizojë provat për të përcaktuar përgjegjësitë dhe shkaqet e sakta që sollën këtë humbje jete në ambientet e punës.