“Kush i hëngri kapelet?”: Protestë ironike para Qeverisë për shkak të skandalit me uniformat e policëve të rinj

Një instalacion dhe baner me përmbajtje satirike është shfaqur këtë të mërkurë në sheshin para ndërtesës së Ekzekutivit në Prishtinë, duke ngritur shqetësimin lidhur me zvarritjet e pajisjes me uniforma për gjeneratën më të re të Policisë së Kosovës. Përmes këtij aksioni simbolik, Lëvizja Revolta ka vënë në shënjestër situatën e krijuar me gjeneratën e 63-të, duke ekspozuar një fotografi të një efektivi të ri dhe pyetjen publike se ku kanë përfunduar kapelet që ishin paraparë për ta. Sipas njoftimit zyrtar të kësaj lëvizjeje, ngjarja solemne e diplomimit, e cila fillimisht ishte caktuar për datën 1 nëntor, u shty për 6 nëntor, pasi Ministria e Punëve të Brendshme dështoi të siguronte në afat elementet e duhura të veshjes zyrtare për këtë ceremoni. Edhe pse kapelat e reja nuk pritet të bëhen të gatshme deri më 6 nëntor, autoritetet kanë arritur të sigurojnë një zgjidhje të përkohshme duke huazuar për pesë ditë kapelet e vjetra nga efektivët aktualë, gjë që mundëson mbajtjen e ceremonisë. Veç banerit, aktivistët kanë ekspozuar edhe një diplomë simbolike, duke ironizuar rrethanat sfiduese në të cilat kuadri i ri po nis rrugëtimin e tyre profesional, duke përmendur mungesën e uniformave të plota, kushtet e papërshtatshme, pagat joadekuate dhe mungesën e sigurimit shëndetësor e jetësor. Në fund të reagimit të tyre, përfaqësuesit e Lëvizjes Revolta kanë theksuar se ndonëse kadetët e rinj pritet të ushtrojnë detyrën me përkushtim të plotë, është koha që edhe Ministria e Punëve të Brendshme të japë llogari për dështimet dhe situatën e turpshme të krijuar.