Tragjedi në Vlorë: Humb jetën në krye të detyrës elektricisti 50-vjeçar pasi bie në kontakt me rrymën

Një ngjarje e rëndë ka tronditur fshatin Kocul të Vlorës, ku një punonjës i Drejtorisë së Tensionit të Lartë ka ndërruar jetë tragjikisht, pasi është goditur nga rryma elektrike teksa po ushtronte funksionet e tij zyrtare. Bëhet fjalë për 50-vjeçarin Altin Petanaj, i cili po punonte së bashku me kolegët e tij për riparimin e defekteve në nënstacionin elektrik të zonës kur ndodhi aksidenti fatal. Për shkak të intensitetit të lartë, shoku elektrik ka rezultuar i pashmangshëm dhe me pasojë vdekjen e menjëhershme të punonjësit. Menjëherë pas sinjalizimit, forcat e rendit kanë mbërritur në vendngjarje dhe kanë nisur procedurat hetimore për të hedhur dritë mbi dinamikën e plotë të këtij aksidenti tragjik në punë. Grupi hetimor pritet të zbardhë shkaqet e sakta që sollën këtë humbje jete, si dhe të verifikojë respektimin e rregullave të sigurisë gjatë ndërhyrjes.