Skandal në oborrin mbretëror norvegjez: Libri i ri nxjerr në pah detaje të ndjeshme për transplantin e Mette-Marit

Një libër i sapopublikuar në Norvegji ka ngritur një valë të fuqishme polemikash lidhur me transplantin e mushkërive të Princeshës së Kurorës, Mette-Marit. Vëllimi i ri “Eventyrnettene”, mbajtur firmën e autorit Alfred Fidjestøl, përmban hollësi që sipas ekspertëve përbëjnë shkelje të rëndë të sekretit mjekësor, duke vënë në rrezik edhe ruajtjen e anonimitetit të personit që ka dhuruar organet. Edhe pse në fokus të librit është rrugëtimi i kombëtares norvegjeze të futbollit deri në çerekfinalet e Kupës e Botës, autori ka përfshirë në faqet e tij edhe episodin e ndërhyrjes kirurgjikale të princeshës. Sipas pasazheve në fjalë, Mbreti Harald V – i cili ndërroi jetë në fund të muajit gusht – po kalonte periudhë tejet të ngarkuar, e cila përkonte edhe me dënimin me katër vjet burg të djalit të Mette-Marit, Marius Borg Høiby, për krime seksuale. Autori shkon më tej duke pretenduar se operacioni për transplantin e dyfishtë të mushkërive, të siguruara nga një dhurues i pajetë pas një aksidenti në Skandinavi, ishte kryer pikërisht gjatë ndeshjes së Norvegjisë kundër Irakut. Këto rrethana nuk kishin qenë kurrë më parë publike, ndaj reagimi i institucioneve shëndetësore ka qenë i menjëhershëm. Mjeku kryesor i princeshës dhe drejtori i Klinikës së Pulmonologjisë në Spitalin Universitar Rikshospitalet, Are Martin Holm, e ka cilësuar të papranueshme nxjerrjen e këtyre të dhënave konfidenciale. I ndodhur përballë kritikave, autori Alfred Fidjestøl ka pranuar se ka bërë një lloj gabimi teknik në redaktim, duke u arsyetuar se synimi i tij ishte thjesht të përmendte faktin se princesha i ishte nënshtruar një ndërhyrjeje kohët e fundit, dhe jo të specifikonte datën e saktë të ndeshjes me Irakun. Në fakt, Pallati Mbretëror kishte njoftuar zyrtarisht që më 17 qershor se Mette-Marit kishte kryer me sukses transplantin e mushkërive në Spitalin Universitar Rikshospitalet në Oslo. Komunikata zyrtare theksonte se operacioni kishte ecur mbarë, por se princesha do të duhej të qëndronte e shtruar për një periudhë disa javore nën kujdesin mjekësor të specializuar, siç parashikohet në rregullat e këtyre ndërhyrjeve. Kujtojmë se Princesha e Kurorës ishte diagnostikuar që në vitin 2018 me fibrozë pulmonare, një sëmundje kronike dhe fatkeqësisht të pashërueshme që dëmton rëndë indet e mushkërive dhe vështirëson frymëmarrjen. Megjithëse fillimisht gjendja e saj u menaxhua përmes terapisë mjekësore dhe ndryshimeve në stilin e jetesës, përparimi i sëmundjes e bëri të pashmangshëm transplantin, për shkak të rënies drastike të kapacitetit pulmonar dhe lodhjes kronike. Kjo periudhë sfiduese për familjen mbretërore u shoqërua edhe me një tjetër humbje të rëndë, atë të Mbretit Harald V, vjehrrit të Mette-Marit, i cili u nda nga jeta më 28 gusht pas një shtrimi në spital për shkak infeksioni. Ceremonia mortore publike u mbajtur më 9 shtator, ku morën pjesë personalitetet mbretërore dhe ku ishte i pranishëm edhe Marius Borg Høiby, i cili në ato momente ndodhej nën masën e arrestit shtëpiak.