Superligë e Hendbollit: Shqiponja shkëlqen në Obiliq dhe regjistron fitoren e tretë

Skuadra e Shqiponjës i është rikthyer sukseseve në elitën e hendbollit të Kosovës, në kategorinë e femrave, duke shënuar një tjetër fitore të rëndësishme në këtë edicion. Në takimin e mbetur të xhiros së tretë, i cili u zhvillua të enjten në Obiliq, vajzat nga Gjakova treguan paraqitje më të mirë në fushë dhe triumfuan ndaj Terezës me rezultatin e pastër 25:17. Kontributin kryesor në këtë fitore të Shqiponjës e dha Ana Carolini Gonçalves me nëntë gola të shënuar, e ndjekur nga Alma Nivokazi që kontribuoi me pesë të tjerë. Ndërkohë, te skuadra e Terezës u dallua Arjeta Imeraj, e cila u tregua më efikasja duke tundur rrjetën gjashtë herë. Pas këtij rezultati, Shqiponja ngjitet në kuotën e tri fitoreve kundrejt një humbjeje të vetme, duke grumbulluar gjashtë pikë dhe pozicionuar në vendin e tretë të tabelës. Për Terezën, kjo humbje e lë në kuotën e dy pikëve, në vendin e shtatë të renditjes.