Tragjedi në Drenas: Humb jetën në vendin e punës punëtori teknik i shkollës “Fehmi Lladrovci”

Një ngjarje tronditëse ka tronditur qytetin e Drenasit, ku punëtori teknik i Shkollës Profesionale (IAAP) “Fehmi Lladrovci”, Hajrush B. Berisha, ka ndërruar jetë gjatë orarit të punës. Lajmi tragjik është bërë i ditur nga vetë institucioni arsimor përmes një njoftimi zyrtar, ku saktësohet se viktima ka ndërruar jetë më 5 nëntor, rreth orës 18:23, në ambientet e vendit të tij të punës. Për shkak të kësaj humbjeje të madhe dhe në shenjë respekti e zie për të ndjerin, drejtoria e shkollës ka marrë vendimin që procesi mësimor për ditën e sotme, më 6 nëntor, të pezullohet plotësisht. “Me pikëllim të thellë ju njoftojmë se sot, rreth orës 18:23 në vendin e tij të punës, ka ndërruar jetë punëtori teknik i shkollës sonë, Hajrush B. Berisha”, thuhet ndër të tjera në komunikatën e lëshuar nga drejtoria e shkollës. Në fund të njoftimit, udhëheqja e institucionit arsimor i ka përcjellë ngushëllimet më të sinqerta familjes Berisha, të afërmve, kolegëve dhe mbarë komunitetit shkollor për këtë humbje të parakohshme.