Nëntori vendimtar në UEFA Nations League: Trajneri Maran zbulon listën e Kombëtares për sfidat ndaj Finlandës dhe Bjellorusisë

Kombëtarja shqiptare e futbollit po bëhet gati për dy sfidat e fundit të vlefshme për Grupin C1 në kuadër të UEFA Nations League, ku do të matë forcat me Finlandën dhe Bjellorusinë. Për këto dy përballje vendimtare të muajit nëntor, tekniku i kuqezinjve, Rolando Maran, ka zyrtarizuar listën me 27 lojtarët e ftuar. E vetmja risi në këtë grupim është emri i mbrojtësit të Dinamo City, Ysni Ismaili, i cili fiton për herë të parë në karrierë një ftesë për të qenë pjesë e Përfaqësueses A të Shqipërisë. Angazhimet e muajit nëntor për kuqezinjtë do të nisin në shtëpi. Më 12 nëntor, në orën 20:45, stadiumi “Air Albania” do të presë duelin ndaj Finlandës. Menjëherë pas kësaj ndeshjeje, grupi do të udhëtojë drejt Hungarisë, ku më 15 nëntor, në orën 18:00, do të zhvillohet sfida kundër Bjellorusisë në stadiumin “Illovszky Rudolf”. Lista e plotë e të grumbulluarve: Portierë: Etrit Berisha, Alen Sherri, Mario Dajsinani. Mbrojtës: Berat Gjimshiti, Arlind Ajeti, Ardian Ismajli, Klisman Cake, Samuele Sina, Elseid Hysaj, Ysni Ismaili, Mario Mitaj, Stavro Pilo, Naser Aliji. Mesfushorë: Kristjan Asllani, Ylber Ramadani, Qazim Laçi, Juljan Shehu, Luis Hasa, Feta Fetai, Klevi Qefalija, Ernest Muçi, Arbër Hoxha, Taulant Seferi. Sulmues: Rey Manaj, Myrto Uzuni, Mirlind Daku, Cristian Shpendi.