Skemë mashtrimi me betonin në Tiranë, drejtuesi italian dalë para gjykatës – Vihen në sekuestro pasuri me vlerë 10 milionë euro

Prokuroria pranë Gjykatës së Shkallës së Parë të Juridiksionit të Përgjithshëm Tiranë ka përfunduar hetimet paraprake dhe ka kërkuar dërgimin për gjykim të shtetasit italian me inicialet G.T., në cilësinë e administratorit të kompanisë “Euro Beton 2005” sh.p.k. Ai akuzohet zyrtarisht për tri vepra penale të rënda: “Mashtrimi”, “Fshehja e të ardhurave” dhe “Pastrimi i produkteve të veprës penale ose i veprimtarisë kriminale”, parashikuara nga nenet përkatëse të Kodit Penal. Ky proces penal, i regjistruar në vitin 2026 me numër 1718, është pasojë e një hetimi disa mujor të ndjekur përmes metodave speciale. Sipas organit të akuzës, është zbuluar një mekanizëm i mirëfilltë mashtrimi, ku subjekti tregtar siguronte lëndë të para nga kompani të ndryshme vendase duke u premtuar shlyerje monetare ose shkëmbim me apartamente. Megjithatë, në fazat e mëvonshme, administratori mohonte si furnizimet e marra ashtu edhe detyrimet financiare ndaj furnitorëve. Materialet e siguruara përdoreshin nga shoqëria për prodhimin dhe tregtimin e betonit. Hetimet kanë dëshmuar se transaksionet e pafiskalizuara dhe qarkullimi i këtij produkti shërbenin si maskë për të fshehur të ardhurat reale dhe për të integruar në ekonominë e ligjshme përfitimet e paligjshme. Si rezultat i kësaj situate, është urdhëruar sekuestro preventive mbi të gjitha aktivet e luajtshme dhe të paluajtshme të kompanisë. Në kuadër të këtij operacioni, aktiviteti tregtar dhe pasuritë e sekuestruara i kanë kaluar për menaxhim Agjencisë së Administrimit të Pasurive të Sekuestruara dhe të Konfiskuara. Konkretisht, bëhet fjalë për 8 pasuri të paluajtshme, ku përfshihen: një tokë arë prej 560 m²; një pallat me sipërfaqe trualli 2780 m² dhe 914 m² ndërtim; një tokë arë prej 1580 m²; një tokë arë prej 310 m²; një njësi shërbimi me sipërfaqe 71.5 m²; një tokë arë prej 63 m² në bashkëpronësi të shoqërisë; si dhe dy njësi të tjera tregtare me sipërfaqe përkatësisht 61.6 m² dhe 138.84 m². Po kështu, gjatë këtij aksioni janë vënë nën sekuestro edhe 25 pasuri të luajtshme në pronësi të subjektit nën hetim, të cilat konsistojnë në automjete të rënda funksionale si makina betonierë, pompa betoni dhe mjete të dedikuara për transportin e tyre, vlera e përgjithshme e të cilave kap shifrën e rreth 10 milionë eurove.