Goditet karteli shqiptar i drogës në Itali: Sekuestrohen 240 kg kokainë, 14 milionë euro pastrim parash dhe 52 të dyshuar në hetim

Autoritetet italiane, në bashkëpunim të ngushtë me Prokurorinë e Posaçme Kundër Korrupsionit dhe Krimit të Organizuar (SPAK), kanë çmontuar një organizatë të fuqishme kriminale ndërkombëtare, e cila drejtohej kryesisht nga shtetas shqiptarë. Ky goditje e fortë erdhi si rezultat i operacionit të koduar “Caveau 38”, i cili ka hedhur dritë mbi një skemë të gjerë paligjshmërie që shtrihej mes Shqipërisë, Italisë, Holandës dhe Gjermanisë. Sipas të dhënave zyrtare nga hetimet, ky rrjet kriminal ka arritur të trafikojë afërsisht 240 kilogramë kokainë nga territori shqiptar drejt atij italian. Paralelisht, grupi ka realizuar transferta monetare prej rreth 14 milionë eurosh cash, duke i lëvizur nga Italia drejt Shqipërisë dhe destinacioneve të tjera të huaja. Goditja u finalizua nga trupat e Guardia di Finanza në Lecco, me urdhër të Prokurorisë së Antimafias në Milano. Gjatë këtij aksioni u vendos sekuestro preventive mbi dy shoqëri tregtare, të cilat dyshohet se shërbenin si instrumente kryesore për pastrimin e kapitaleve të pista të gjeneruara nga trafiku i lëndëve narkotike. Në total, numri i personave që po hetohen ka shkuar në 52, ku përfshihen edhe pronarët e administratorët e dy kompanive të bllokuara. Prokurori Marcello Viola bëri të ditur se ky rrjet nuk merrej vetëm me tregtimin e sasive të mëdha të kokainës, por edhe me grumbullimin dhe transferimin jashtë kufijve të fitimeve marramendëse të paligjshme. Hetuesit kanë arritur të dokumentojnë gjithashtu se pastrimi i parave kryhej edhe përmes blerjes së metaleve të çmuara. Konkretisht, autoritetet zbuluan blerjen e të paktën 8 kilogramëve shufra ari, transaksione që kryheshin përmes një firme të përpunimit të metaleve të çmuara me seli në Milano dhe Alessandria. Ndërkohë, një tjetër biznes i vendosur në Lecco funksiononte si një lloj kasaforte financiare për organizatën, duke kanalizuar fondet e pista drejt investimeve në pasuri të paluajtshme. Gjatë ndërhyrjes së forcave të rendit, gjashtë persona u vunë në pranga në flagrancë, ndërsa u bë i mundur sekuestrimi i 1.5 milionë eurove cash dhe 32 kilogramëve lëndë narkotike, të ndara mes kokainës, heroinës dhe kanabisit. Për të mos ndërprerë aktivitetin e dy kompanive dhe për të mbrojtur stafin e punonjësve – të cilët, sipas hetimeve paraprake, nuk kishin asnjë dijeni për skemat kriminale të pronarëve – drejtësia ka caktuar një administrator të posaçëm gjyqësor. Ky operacion ndërkombëtar, ku dha kontributin e tij edhe grupi hetues i SPAK-ut, dëshmon edhe një herë suksesin e bashkëpunimit dypalësh mes autoriteteve shqiptare dhe atyre italiane në betejën e përbashkët kundër krimit të organizuar dhe pastrimit të produkteve të veprës penale.