Ngjarje surprizë në një burg brazilian: Të paraburgosurit pushtojnë depozitën e ujit për drejtësi dhe dashuri

Një situatë e pazakontë ka ndodhur në qendrën e paraburgimit Pinheiros (CDP) në São Paulo të Brazilit, ku dy të burgosur janë ngjitur në majë të depozitës së ujit të institucionit, duke shkaktuar alarm dhe ndërprerje të lëvizjeve të brendshme. Ngjarja u regjistrua të enjten pasdite gjatë kohës që të paraburgurit po shoqëroheshin drejt shkollës së brendshme të burgut. Dy protagonistët shfrytëzuan rastin për të tërhequr vëmendjen mbi kauza krejtësisht të ndryshme: njëri prej tyre kishte veshur një bluzë të bardhë me thirrjen urgjente për “Të Drejtat e Njeriut”, kurse tjetri zgjodhi këtë hapësirë publike për t’i dërguar një dedikim romantik partneres së tij, duke shkruar “Raquel, të dua”. Pamjet e transmetuara nga rrjeti televiziv Globo dëshmuan praninë e dy burrave lart në rezervuar, ndërkohë që njëri prej tyre figuronte ende i prangosur. Pas një ore bisedimesh intensive me ekipet e sigurisë, situata u qetësua dhe të dy pranuan të zbrisnin vullnetarisht. Me të prekë tokën, ata u panë duke përqafuar gardianët, ndërsa kontrolli fizik konfirmoi se nuk kishin armë apo sende të rrezikshme me vete. Administrata e Policisë së Burgjeve në São Paulo konfirmoi se incidenti përfundoi pa asnjë të lënduar. Për veprimin e tyre rebel, autoritetet kanë vendosur transferimin e menjëhershëm të të dy të paraburgosurve në një tjetër institucion të sigurisë, ku do të përballen me ndëshkimet disiplinore përkatëse.