Skema e zhvatjes dhe pastrimit të parave në Kumanovë: Prokuroria zbardh detajet tronditëse të grupit kriminal

Një hua modeste prej 4 mijë eurosh, e cila duhej të shlyhej brenda një muaji, u shndërrua në një kalvar të vërtetë për një qytetare nga Maqedhonia e Veriut. Pavarësisht se ajo kishte shlyer plotësisht detyrimin financiar ndaj huadhënësit, duke përfshirë edhe kamatën e rënë dakord prej 2.500 eurosh, presionet ndaj saj nuk kishin të ndalur. Sipas të dhënave zyrtare nga Prokuroria për Ndjekjen e Krimit të Organizuar dhe Korrupsionit, organizatorët e kësaj skeme kërkuan që llogaria e saj bankare të përdorej për qarkullimin e kapitaleve të siguruara përmes zhvatjes. Kur ajo refuzoi kategorikisht këtë kërkesë, ndaj saj nisën menjëherë kanosjet. Hetimet dëshmojnë se viktimës iu kërkua gjithashtu të linte peng veturën e saj për borxhe që në realitet nuk ekzistonin fare. Për arritjen e këtij qëllimi, autorët e dyshuar përpiluan shkresa fiktive, falsifikuan firmën e saj dhe i legalizuan te noteri pa dijeninë e të dëmtuarës. Organet e ndjekjes penale theksojnë se grupi nuk u ndal me kaq, por duke shfrytëzuar dokumentacionin e falsifikuar, vijuan presionin që ajo t'u dorëzonte automjetin dhe të paguante një borxh të trilluar prej një milion denarësh. Në kumtesën e Prokurorisë sqarohet skema se a si vepronte ky rrjet kriminal. “Në një periudhë më të gjatë kohore, përkatësisht që nga viti 2021, grupi i formuar nga i dyshuari i parë nga Kumanova, me kërcënime të rënda ka zhvatë para nga persona të dëmtuar, duke i detyruar dhe më së shpeshti duke shfrytëzuar varësinë e tyre për shkak të huave të mëparshme. Edhe pse të dëmtuarit i kishin kthyer shumat e dakorduara, të dyshuarit vazhdonin t’u kërkonin pagesa shtesë, ndërsa llogaritë e tyre i përdornin për të transferuar shuma të mëdha parash të përfituara nga zhvatja, duke i paraqitur ato si hua formale dhe më pas duke i tërhequr në para të gatshme”, theksohet në njoftim. Një rast i ngjashëm ka ndodhur edhe me një viktimë tjetër, e cila gjatë vitit 2021 kishte marrë dy herë nga 180 mijë denarë hua, mjete këto që i duheshin për operimin dhe mjekimin e bashkëshortes. Edhe pse ai i kishte kthyer mjetet financiare sipas marrëveshjes paraprake, të dyshuarit vazhduan t'i kërkonin fonde shtesë në formë kamate. Duke keqpërdorur gjendjen e tij të rënduar dhe varësinë e krijuar, ata e detyruan edhe këtë qytetar që llogarinë e tij personale bankare ta vërë në dispozicion për transferimin e sasive të mëdha të parave të paligjshme. Lidhur me këto ngjarje kriminale, Prokuroria Themelore Publike për Ndjekjen e Krimit të Organizuar dhe Korrupsionit ka nisur procedurë hetimore ndaj katër personave, të cilët dyshohen për veprat penale të bashkimit kriminal, pastrimit të parave dhe zhvatjes. Për tre prej tyre është parashtruar kërkesë për caktimin e masës së paraburgimit, ndërsa i dyshuari i katërt ndodhet jashtë vendit prej një farë kohe. Në këtë skemë të paligjshme rezulton të jetë përfshirë edhe një noter, i cili dyshohet për veprën e moskryerjes me ndërgjegje të detyrave të shërbimit, pasi kishte lejuar vërtetimin e shkresave të rreme. Për të është kërkuar vendosja e masave të kujdesit. Hetimet paraprake vijojnë ende, ndërsa të dyshuarit gëzojnë parimin e pafajësisë deri në marrjen e një vendimi përfundimtar nga gjykata.