Bashkëpunimi ushtarak, ministri Maqedonci nderohet gjeneralin amerikan Stephen E. Osborn me medaljen e lartë

Ministri i Mbrojtjes së Kosovës, Ejup Maqedonci, ka zhvilluar sot një takim zyrtar me gjeneralmajor Stephen E. Osborn, adjutant i përgjithshëm i Gardës Kombëtare të Ajovës. Gjatë këtij takimi, ministri Maqedonci i ka ndarë zyrtarit të lartë amerikan medaljen “Shërbim i Shquar” të dikasterit që ai drejton. Kreu i Mbrojtjes në Kosovë ka shprehur mirënjohjen e tij për angazhimin dhe ndihmën e vazhdueshme që gjenerali amerikan i ka dhënë Forcës së Sigurisë së Kosovës (FSK), duke kontribuar në ngritjen e partneritetit dypalësh në sektorin e mbrojtjes mes vendit tonë dhe shtetit të Ajovës. “Në shenjë mirënjohjeje për shërbimin e tij të shquar, përkushtimin dhe kontributin në zhvillimin dhe avancimin e kapaciteteve të Forcës së Sigurisë së Kosovës, e nderova me Medaljen ‘Shërbim i Shquar’ të Ministrisë së Mbrojtjes”, u shpreh Maqedonci. Gjatë bisedës, u vu në dukje se bashkëpunimi i ngushtë me Gardën Kombëtare të Ajovës ka qenë vendimtar për procesin e transformimit, rritjen e profesionalizmit dhe përmirësimin e gatishmërisë operacionale të trupave të FSK-së. Maqedonci vlerësoi se ky partneritet është dëshmi e qartë e lidhjeve të forta strategjike që ekzistojnë ndërmjet Republikës së Kosovës dhe Shteteve të Bashkuara të Amerikës. Në përfundim të takimit, ministri riafirmoi se Shtetet e Bashkuara të Amerikës vazhdojnë të jenë aleati strategjik kyç në rrugëtimin e zhvillimit dhe konsolidimit të ushtrisë kosovare.