Kriza e besimit: Qytetarët në Zvicër shfaqin frikë në rritje për të ardhmen financiare

BERNË – Optimizmi i familjeve zvicerane ka pësuar një goditje të fortë gjatë muajit tetor, duke reflektuar një pasiguri të theksuar ekonomike. Kështu dëshmojnë të dhënat zyrtare të bëra publike nga Sekretariati Shtetëror për Ekonomi (Seco). Statistikat tregojnë se treguesi i besimit të konsumatorëve ka rënë ndjeshëm në kuotën -44,9 pikë. Për krahasim, ky indeks regjistronte -36,5 pikë gjatë muajit shtator, ndërsa në të njëjtën periudhë të vitit të kaluar kapte vlerën -36,9 pikë. Goditja më e fortë, sipas sondazhit, vjen nga perceptimi i qytetarëve për buxhetin e tyre familjar. Nënindeksi që mat gjendjen aktuale financiare ka rënë frikshëm në -53,8 pikë, ndërsa pritshmëritë për të ardhmen financiare kanë zbritur në -44,7 pikë. Të dyja këto kategori shënojnë rënie me mbi 10 pikë krahasuar me dymbëdhjetë muaj më parë. Ndërkohë, parashikimet për ecurinë e përgjithshme ekonomike kanë mbetur kryesisht në të njëjtat nivele, duke u pozicionuar në -48,2 pikë. Ky vlerësim ekonomik u mbështet te përgjigjet e 2.717 qytetarëve të moshës 16 vjeç e lart. Vlen të theksohet se Seco e monitoron këtë tregues të besimit të konsumatorëve që prej vitit 1972. Këto tregues vijnë në një moment tejet delikat, ndërkohë që familjet zvicerane po përgatiten të përballojnë shpenzimet e sezonit të dimrit. Së shpejti, qytetarët do t'i drejtohen gjithashtu kutive të votimit për të vendosur rreth një propozimi për rritjen e TVSH-së.