Nis rrethi i dytë në ProCredit Superligë: Duelet më interesante që premtojnë spektakël këtë fundjavë

Kampionati i basketbollit në ProCredit Superliga rikthehet fuqishëm këtë fundjavë me ndeshjet e xhiros së tetë, e cila shënon edhe fillimin zyrtar të rrethit të dytë të këtij edicioni. Një nga përballjet më interesante të kësaj jave do të zhvillohet në Suharekë, ku Golden Eagle Ylli do të presë skuadrën e Bashkimit. Therandasit hyjnë në këtë takim pas triumfit ndaj Rahovecit 029 dhe gëzojnë një bilanc prej katër fitoresh e tri humbjesh, kurse prizrenasit mbajnë kryesimin e tabelës me gjashtë fitore dhe vetëm një humbje. Në ballafaqimin e parë të këtij sezoni, Bashkimi kishte dalë fitues me shifrat 96:60, ndërsa tani Ylli synon një epilog tjetër para mbështetësve të vet. Një vëmendje e madhe do të përqendrohet edhe te klasikja e basketbollit vendor ndërmjet Pejës dhe Sigal Prishtinës, e cila do të luhet të shtunën në palestrën “Karagaqi”. Këto dy skuadra me rivalitet historik nuk po kalojnë momentin e tyre më të mirë në kampionat; pejanët numërojnë dy fitore e pesë humbje, kurse kryeqytetasit regjistrojnë tri fitore dhe katër humbje. Ndërkohë, kampionia në fuqi, Trepça, do të presë Rahovecin 029 në palestrën “Minatori”. Mitrovicasit vijnë pas një serie prej katër fitoresh radhazi në elitë dhe synojnë ta zgjasin këtë ecuri pozitive edhe përballë rahovecasve. Përballja e parë mes tyre, në hapje të këtij edicioni, ishte mbyllur me fitoren e mitrovicasve me rezultatin 106:101, pas një loje të zjarrtë deri në sekondat e fundit. Në një tjetër takim mjaft domethënës, Vëllaznimi do të jetë nikoqir i Borës në Gjakovë. Kuqezinjtë lokalë kërkojnë suksesin e dytë sezonal, ndërsa ekipi nga Prishtina synon vazhdimësinë e rezultateve të mira pas fitores ndaj Pejës në xhiron e kaluar. Në ndeshjen e parë të këtij sezoni, Bora kishte triumfuar bindshëm ndaj gjakovarëve me shifrat 90:67. Të gjitha sfidat e kësaj jave në ProCredit Superligë do të vijnë direkt për shikuesit në ekranet e Art Motion, ndërsa tifozët mund t'i sigurojnë biletat e tyre përmes platformës online KickTick.