Ben Blushi: Kosovarët ushqejnë urrejtje ndaj Shqipërisë, pas kësaj qëndron Albin Kurti

Në hapësirën mbarëshqiptare, dukuria që dikush nga diaspora apo trojet e tjera të shprehë mospëlqim për Shqipërinë, apo ta cilësojë atë si narkoshtet, është një rast i rrallë që zor se gjendet ose dëgjohet. Megjithatë, Ben Blushi sjell një këndvështrim tjetër, duke pohuar se të gjithë e etiketojnë në këtë mënyrë, një pretendim ky që ngre pikëpyetje se si është e mundur të thuhet në emër të gjithsecilit. Ndërkohë, në medie të njohura ndërkombëtare si ato italiane e gjermane, përmes dokumentarëve të transmetuara në platforma si Rai Uno, ARTE dhe ZDF, nuk mungojnë rastet kur gazetarë dhe aktivistë nga vetë Shqipëria e quajnë kryeministrin Edi Rama drejtues të një strukture kriminale dhe vendin e tyre narkoshtet. Këto akuza janë kthyer në refren edhe në platformat digjitale, televizionet vendase, si dhe në fjalimet e shpeshta të politikanit Sali Berisha. Gjatë një interviste në Dritare TV me gazetarin Roland Qafoku, Ben Blushi ngriti shqetësimin se shqiptarët e Kosovës ndiejnë urrejtje ndaj Shqipërisë, duke e lidhur këtë frymë me ndikimin dhe puritanizmin e kryeministrit Albin Kurti, të cilin e akuzon se e ka quajtur Shqipërinë narkoshtet – një deklaratë kjo që nuk ka gjetur ndonjëherë mbështetje publike në burimet e informimit. Ndonëse Edi Rama nuk mund të thuhet se urrehet në Kosovë, është fakt se mbështetja ndaj tij është zbehur ndjeshëm, ndërsa arsyet e kësaj mungese respekti lidhen me disa vendime të kaluara politike që kanë lënë gjurmë të thella. Një nga to daton në vitin 2006, kur kreu i qeverisë shqiptare i dorëzoi Goran Bregoviqit «Çelësin e Tiranës», në një kohë kur Kosova ende lëngonte nga plagët e luftës dhe kërkonte me ngulm fatin e të zhdukurve në varrezat masive në Serbi. Kritikët vënë në dukje se Rama nuk e pa Serbinë si një shtet agresor, por përmes një optike nostalgjike, duke u shndërruar herë pas here në një avokat të saj në arenën evropiane. Veprimet e tij vazhduan edhe në vitin 2015, kur ushtroi ndikim te Hashim Thaçi për themelimin e Gjykatës Speciale, ndërkohë që autoritetet në Beograd vazhdonin të heshtnin për vendndodhjen e trupave të viktimave të pafajshme. Më tej, në vitin 2016, gjatë vizitës në Nish, Edi Rama zgjodhi të citonte shkrimtarin serb Ivo Andriq, autorin e Elaboratit të vitit 1939 që parashikonte copëtimin e Shqipërisë dhe spastrimin etnik të popullsisë shqiptare. Ky dokument famëkeq, i ngjashëm me doktrinat fashiste, u përcoll me krenari nga kryeministri shqiptar, pa treguar ndjeshmëri ndaj vuajtjeve të popullit të tij, ndërsa lideri serb Aleksandër Vuçiç nuk shfaqi kurrë pendesë për krimet e kryera. Për këtë qasje skandaloze, Blushi kishte reaguar më 14 tetor 2016 në gazetën «Zëri» përmes shkrimit «Edi Rama si hardhucë», ku e krahasonte këtë veprim me skenarin sikur një përfaqësues i popullit hebre të shkonte në Gjermani dhe të citonte ideologët e Rajhut të Tretë, një gjë e cila do të ishte moralisht e papranueshme.