Kërçeli akuzon Komunën e Prishtinës: Diskutohet aneks-kontrata prej 3 milionë eurosh dhe fatura prej 18 mijë eurosh për bustin e Rugovës

Deputeti i Kuvendit të Kosovës nga radhët e Lëvizjes Vetëvendosje (LVV), Ilir Kërçeli, ka hedhur dyshime të forta mbi mënyrën e menaxhimit të kontratave publike nga ana e Komunës së Prishtinës. Gjatë një prononcimi televiziv, ai ka kërkuar llogari për fatin e shtyllave të vjetra të ndriçimit, ekzistencën e një aneks-kontrate që kap shifrën e rreth 3 milionë eurove, si dhe për detajet financiare të projekteve të lidhura me hapësirat publike të kryeqytetit. Kërçeli ka bërë të diture se ka pranuar informacione se pas përmbylljes së marrëveshjes fillestare prej 10 milionë eurosh për sistemin e ndriçimit smart, ekzekutivi komunal mund të ketë lidhur një aneks-kontratë shtesë. Sipas pretendimeve të tij, kjo marrëveshje e re arrin vlerën e 30 për qind të shumës bazë, duke ngritur pikëpyetje serioze mbi transparencën e procesit. “Pyetja e parë është: A mund të na informojë Komuna e Prishtinës se ku kanë përfunduar shtyllat e vjetra? Pyetja e dytë është: A ka nënshkruar Komuna e Prishtinës, rastësisht, edhe një aneks-kontratë prej 30 për qind, apo rreth 3 milionë euro më shumë, për këtë kontratë? Kontrata fillestare ishte 10 milionë euro dhe është përmbyllur. Mirëpo, unë kam informacione se është nënshkruar edhe një kontratë aneks”, ka theksuar Kërçeli gjatë paraqitjes së tij në ATV. I pyetur nëse qëllimi i këtyre denoncimeve është ndëshkimi penal i kryetarit Përparim Rama, deputeti i majtë ka mohuar një gjë të tillë, duke nënvizuar se roli i deputetit nuk është ai i gjykatësit, por i sinjalizuesit të parregullsive ligjore tek institucionet përgjegjëse. “Nuk është ideja që ne po kërkojmë të arrestohet kryetari Përparim Rama. Nuk është ideja që ne ia dëshirojmë burgun; ne nuk ia dëshirojmë burgun askujt. Edhe nëse arrestohet Përparim Rama, kjo duhet të ndodhë vetëm nëse ka bazë ligjore”, u shpreh ai, duke shtuar se heshtja përballë dyshimeve të tilla do t'i bënte vetë ligjvënësit bashkëpërgjegjës. Në një tjetër zhvillim, Kërçeli ka komentuar edhe ambiciet politike të kreut të Prishtinës dhe kandidaturën e tij të mundshme për kryetar të Lidhjes Demokratike të Kosovës (LDK). Ai ka ngritur dyshime se ky hap mund të shërbejë si një mburojë politike ndaj zhvillimeve të mundshme në organet e drejtësisë. “Unë mendoj se zoti Përparim Rama e bëri zyrtarizimin e kandidaturës së tij për kryetar të LDK-së vetëm për një arsye: që, në rast se ngrihet ndonjë aktakuzë ndaj tij, të viktimizohet duke thënë: ‘Shikoni, në momentin kur shpreh ambicie për kryeministër, shikoni se çfarë po më bëjnë! Po merren me gjykata, po më ngrenë aktakuza’”, tha Kërçeli. Në fund, deputeti ka hedhur poshtë çdo pretendim se Lëvizja Vetëvendosje mund të ketë ndikuar apo shtyrë kryetarin Rama drejt nënshkrimit të këtyre marrëveshjeve të diskutueshme, duke ritheksuar se partia e tij vazhdimisht ka bërë thirrje publike për mbrojtjen e parasë publike dhe respektimin e besimit të qytetarëve të Prishtinës.