Përplasja për ndriçimin inteligjent: Përparim Rama i kundërpërgjiget ashpër deputetit të Vetëvendosjes

Kryetari i Komunës së Prishtinës, Përparim Rama, ka reaguar ashpër ndaj deputetit të Lëvizjes Vetëvendosje, Ilir Kërçeli, pasi ky i fundit ngriti dyshime publike rreth shpenzimeve të lidhura me kontratën e ndriçimit inteligjent në kryeqytet. Përmes një deklarate publike, i pari i Prishtinës e ka akuzuar deputetin se po dezinformon qëllimisht opinionin publik, duke e paraqitur koston e një shërbimi të tërë vetëm si çmim të një shiriti. Sipas shpjegimeve të dhëna nga kryetari Rama, shuma prej 8.50 eurosh për metër përfshin një paketë të plotë shërbimesh dhe materialesh: nga furnizimi, transporti, puna e forcës sonë njerëzore, shtrirja dhe vendosja në kanal nga specialistët, deri te garancia dhjetëvjeçare, mirëmbajtja pa kosto shtesë për të njëjtën periudhë dhe Tatimi mbi Vlerën e Shtuar (TVSH). “8.50 euro për metër përfshijnë furnizimin me material, transportin, angazhimin dhe punën e punonjësve të kompanisë, shtrirjen dhe vendosjen e shiritit në kanalin përkatës nga punonjësit kompetentë, garancinë për 10 vjet, sipas kushteve të kontratës, mirëmbajtjen për 10 vjet, sipas nevojës, pa kosto shtesë, si dhe Tatimin mbi Vlerën e Shtuar (TVSH)”, ka shkruar Rama, duke e cilësuar paraqitjen e këtij çmimi si një veprim të ulët. Në mbrojtje të kësaj procedure, Rama ka theksuar se ajo tashmë është kaluar në filtër nga disa institucione dhe mekanizma të pavarur mbikëqyrës, duke përfshirë Organin Shqyrtues të Prokurimit (OSHP), Komisionin Rregullativ të Prokurimit Publik (KRPP), audituesit e brendshëm e të jashtëm, si dhe organet e hetuesisë. “Nëse Ilir Kërceli mendon që është më i dijshëm se të gjitha këto institucione dhe organe kompetente, le të na kallëzojë!”, ka deklaruar ai, duke i sugjeruar deputetit që të njihet hollësisht me dokumentacionin përkatës para se të dalë me akuza në publik. Po ashtu, Rama ka dhënë detaje rreth funksionit real të shiritit nëntokësor, duke hedhur poshtë pretendimet se ai shërben vetëm për të rrethuar apo kufizuar zonën e punimeve. Sipas tij, bëhet fjalë për një element paralajmërues nëntokësor që sinjalizon praninë e kabllove elektrike, duke parandaluar kështu dëmtimet e mundshme dhe rrezikimin e punëtorëve gjatë gërmimeve të ardhshme nga ndërmarrjet si Ujësjellësi, KEDS-i, Termokosi apo kompani të tjera. “Ai shirit nuk shërben për ta kufizuar zonën e punimeve. Është shirit nëntokësor që paralajmëron praninë e kabllove elektrike, për të shmangur dëmtimin e tyre dhe mos me i rreziku punëtorët gjatë gërmimeve në të ardhmen nga Ujësjellësi, KEDS-i, Termokosi ose cilado kompani apo ndërmarrje tjetër”, ka shtuar ai. Në përfundim të reagimit të tij, kryetari i Prishtinës paralajmëroi se nuk do të tolerojë dezinformimet dhe do të ndjekë rrugën ligjore për çdo deklaratë që e vlerëson si shpifje ndaj figurës së tij. “E di që pas deklaratave të mia për Kryeministrin do të ketë invazion sulmesh ndaj meje, por më lejoni t’ju rikujtoj se do të kujdesem që për secilën shpifje ta ndjek rrugën ligjore”, ka theksuar ai, duke i drejtuar një thirrje të fundit deputetit: “Ilir, për herën tjetër, lexoje kontratën. Kuptoje. Pastaj dil para qytetarëve”. Kujtojmë se deputeti Kërçeli më parë kishte shprehur dyshime mbi kontratën e ndriçimit inteligjent, duke kërkuar llogari për fatin e shtyllave të vjetra dhe për mundësinë e një aneks-kontrate tre milionë euroshe, si dhe kishte paralajmëruar analizimin e kontratës për sheshin.