Tensioni nuk shuhet, Lewis Hamilton lëshon akuza të reja ndaj Charles Leclerc pas incidentit në Meksikë

Polemikat mes Lewis Hamilton dhe Charles Leclerc duket se janë larg qetësimit, pavarësisht kalimit të ditëve nga incidenti në pistë. Nga trazirat e Meksikës te sfida e radhës në Interlagos të Brazilit, kampioni britanik ka vijuar kritikat e ashpra ndaj pilotit francez, duke sjellë sërish në vëmendje dëmtimin e mundësisë për një dopietë të sigurt për skuderinë e tyre. Në ditën e medias para garës braziliane, ku Leclerc mungoi për shkak të rikthimit në Europë për t'u bërë baba, Hamilton nuk i ka kursyer komentet për stilin e garimit të kolegut të tij. Britaniku e ka cilësuar atë tepër agresiv në fazën e nisjeve, duke e ilustruar këtë me disa raste të kaluara dhe duke e krahasuar qasjen e tij edhe me bashkëtheksimet e mëparshme me emra si Sebastian Vettel apo Carlos Sainz. “Po, mendoj se është shumë agresiv kur më sulmon në pistë. Nuk mund të them më shumë. Në Singapor ishte në brendësi, kur sulmoi Verstappen, pastaj u tërhoq. Ishte shumë ndryshe në Meksikë. Po të shikoni shokët e mëparshëm të skuadrës, ka bërë të njëjtën gjë me Vettel dhe Sainz”, u shpreh Hamilton përpara gazetarëve. Piloti anglez pranoi se zhgënjimi i tij mbetet i pranishëm, ndërsa paralajmëroi një ballafaqim të brendshëm sapo i gjithë ekipi të jetë bashkë. Sipas tij, incidenti në Meksikë i kushtoi shtrenjtë skuadrës, e cila kishte në dorë një fitore të padiskutueshme dhe mundësinë për të siguruar vendet e para me lehtësi të plotë. “Jam ende i frustruar, – u shpreh Lewis – do të flasim me skuadrën kur të jetë koha. Fred është kthyer në Europë me skuadrën. Dhe Charles është me familjen e tij. Por do të flasim patjetër, sepse në Meksikë kishim rastin të fitonim për skuadrën, mund të bënim dopietë me lehtësi. Duhet të punojmë që kjo gjë të mos ndodhë përsëri”. Në përmbyllje të prononcimit të tij, Hamilton preku edhe lidhjen tetëvjeçare që Leclerc gëzon me ekipin, duke theksuar se ai e ka kuptuar gjithmonë peshën e kësaj historie dhe ka bërë çmos për të ndërtuar një ambient të shëndetshëm bashkëpunimi. “Janë 8 vjet dhe është i integruar me skuadrën. E dija që do të ishte një sfidë. E kam respektuar gjithmonë këtë aspekt. Kam punuar që të ndërtoj një raport të mirë me Charles, të jemi në harmoni. Dua gjithmonë që të më respektojnë. Nuk është e lehtë të futësh një person si unë në skuadër, sepse jam shumë këmbëngulës për ndryshimin”, përfundoi ai.