Dajsinani pas humbjes në Rumani: Goli i dytë më ka mbetur peng, por ky është futbolli

“Ky është futbolli, nuk kemi çfarë të bëjmë…”. Pas disfatës me rezultatin 2-0 të pësuar në transfertën rumune përballë Universitatea Craiova, në kuadër të raundit të tretë të ndeshjeve në Conference League, ka reaguar portieri i Egnatias, Mario Dajsinani. “Me thënë të drejtën më ka ngelur pak peng goli i dytë, sepse me 1-0 rezultati, ekipi do ishte akoma në lojë. Megjithatë, ky është futbolli, nuk kemi çfarë të bëjmë”, u shpreh gardiani i skuadrës rrogozhinase. I pyetur rreth paraqitjes së tij, ai shtoi: “Notë e lartë për paraqitjen individuale? Jam i lumtur për paraqitjen time, kam ndihmuar ekipin, e kam mbajtur në lojë gjatë gjithë kohës, por rezultati të bën të ndihesh keq”. Në fund, portieri analizoi edhe forcën e kundërshtarit: “Craiova ka shumë cilësi si ekip, ka kualitet. Ndoshta kjo nuk ishte dita më e mirë, kjo u pa në fushë”.