Toto Wolff: Ferrari dhe Red Bull do ta kishin lënë Antonellin në hije, ashtu si Bearmanin

Ngritja e Andrea Kimi Antonellit konsiderohet një fitore e madhe për akademinë e pilotëve të rinj të Mercedesit, e cila e pikasi talentin italian që në fëmijëri gjatë garave me karting. Për një periudhë prej nëntë vitesh, skuadra gjermane e udhëhoqi atë hap pas hapi drejt elitës botërore, duke e kurorëzuar përfundimisht me titullin kampion për pilotë në Formula 1. Ky sukses shton edhe më shumë meritën e drejtorit Toto Wolff, i cili shënon një tjetër arritje të jashtëzakonshme në karrierën e tij drejtuese, pas gjashtë titujve kampionë të fituar me Lewis Hamilton dhe një tjetri me Nico Rosberg. Pas kurorëzimit të Antonellit, është rihapur debati se përse ai nuk u bashkua me stajën e Ferrarit në vitin 2017. Me këtë rast, Toto Wolff ka hedhur disa kunjë ndaj skuderisë italiane dhe Red Bullit, duke vënë në pah guximin e treguar nga Mercedes për t'i besuar një vend titullari 18-vjeçarit, pa pasur asnjë eksperiencë paraprake në Formula 1. "Asnjëherë nuk ka pasur dyshime brenda Mercedesit për Kimin; ne i qëndruam pranë në çdo moment, madje edhe kur rezultatet nuk ishin në lartësinë e duhur. Sikur të ndodhej te Ferrari apo Red Bull, skepticizmi do të kishte qenë i pashmangshëm," u shpreh numri një i shtabit gjerman. "Ata nuk do ta kishin ulur kurrë drejtpërdrejt në një makinë kryesore. Përkundrazi, do ta kishin lënë në një skuadër periferike, fiks siç ndodhi me Ollie Bearman. Ne kishim ndërtuar një vizion dhe një plan strategjik konkret për Kimi," shtoi ai. "Ky është kulmi i një rrugëtimi nëntëvjeçar, ku janë përfshirë si struktura e skuadrës, ashtu edhe familja e tij. Ai pati mbështetjen e specialistëve më të zotë, pajisjet më bashkëkohore dhe hapësirat e nevojshme për të testuar bolidet e Formula 1," vijoi më tej Wolff. "Çdo hap i karrierës së Kimi-t është financuar ekskluzivisht nga ne; jemi e vetmja skuadër që ndjek këtë filozofi. Nuk është e vërtetë ajo që përflitet se Ferrari apo ndonjë rival tjetër e la t'i ikte nga duart," sqaroi ai. "Kjo është thjesht fryma e një angazhimi maksimal dhe e një djaloshi me aftësi të rralla, i cili e shpërbleu besimin tonë me anë të pistës. Kjo nuk është një arritje e imja personale, por një sukses kolektiv i gjithë sistemit tonë," përfundoi Wolff.