Skandal te Akademia Ushtarake: Për herë të parë mungojnë kadetët shqiptarë, reagon ashpër BDI

Bashkimi Demokratik për Integrim (BDI) ka dalë me një reagim të fortë publik, duke denoncuar faktin se për herë të parë që nga themelimi i Akademisë Ushtarake në vitin 1995, asnjë kadet i komunitetit shqiptar nuk është pranuar në radhët e saj. Sipas kësaj partie, ky zhvillim alarmant ngre pikëpyetje të mëdha mbi peshën dhe ndikimin real të koalicionit VLEN brenda institucioneve të shtetit, ku përfaqësimi i shqiptarëve nuk duhet të mbetet thjesht një zotim në letër, por një e vërtetë e prekshme institucionale. "Megjithatë, përgjegjësia nuk kufizohet vetëm te VLEN-i. Ekzekutivi duhet të vetëdijësohet se besimi reciprok ndërmjet partnerëve nuk fitohet me fjalë boshe, por me mishërimin e barazisë, përfaqësimit dhe akteve politike. Akoma më alarmant është fakti se këto vendime godasin drejtpërdrejt frymën e Marrëveshjes së Ohrit, dëmtojnë përfaqësimin e drejtë dhe proporcional, si dhe rrezikojnë ekuilibrin e marrëdhënieve ndëretnike në vend", theksohet në reagimin e BDI-së. Në fund të deklaratës, kjo forcë politike i bën thirrje VLEN-it që të japë llogari publike: "Ku u tretun premtimet për përfaqësim? Kështu nuk krijohet besim, nuk mbrohen të drejtat dhe nuk konsolidohet bashkëjetesa ndërinstitucionale. Ky nuk është përfaqësim i denjë për shqiptarët! Përfaqësimi nuk përbën një privilegj, por një parim bazë, i cili nuk guxon të bëhet kurrë viktimë e pazareve dhe kalkulimeve politike".