Kontrola të rrepta në tregun digjital të Kosovës: Dhjetëra inspektime dhe konstatohen shkelje të shumta

Inspektorati Qendror i Mbikëqyrjes së Tregut (IQMT) ka intensifikuar aksionet në terren, duke vijuar fushatën e kontrolleve ndaj entiteteve tregtare që ushtrojnë veprimtarinë e tyre përmes internetit. Nëpërmjet një njoftimi zyrtar në rrjetet sociale, Ministria e Tregtisë ka bërë të ditur se grupet e terrenit të IQMT-së, në bashkërendim të ngushtë me Policinë e Kosovës, Administratën Tatimore të Kosovës (ATK) dhe Autoritetin Rregullativ të Komunikimeve Elektronike dhe Postare (ARKEP), po zhvillojnë inspektime të operatorëve të shërbimeve postare në të gjithë vendin. Sipas të dhënave nga ky dikaster qeveritar, 10 grupe inspektuese kanë kryer më shumë se 24 kontrolle. Gjatë këtij operacioni janë konstatuar parregullsi të ndryshme, përfshirë mungesën e kuponit fiskal për produktet e shitura, si dhe mungesën e deklaracionit të prejardhjes dhe dokumentacionit përkatës shoqërues. “Në përputhje me ligjin për IQMT-në, inspektorët u kanë dhënë afat subjekteve përkatëse që të prezantojnë dokumentacionin e nevojshëm, në të kundërtën, do të ndërmerren masat përkatëse ligjore, përfshirë sekuestrimin e produkteve dhe shqiptimin e masave ndëshkuese”, thuhet në njoftimin e Ministrisë. Nga kjo ministri theksojnë se fushata e mbikëqyrjes shtrihet edhe në shqyrtimin e faqeve zyrtare të bizneseve në internet, mënyrën e reklamimit të mallrave, si dhe shqyrtimin me përparësi të ankesave të dërguara nga konsumatorët.