Tragjedia në Itali: 21-vjeçari shqiptar që vrau të ëmën dëgjohet nga gjyqtari në repartin e psikiatrisë

Seanca e marrjes në pyetje për 21-vjeçarin me origjinë shqiptare, Eduart Xhani, i cili i mori jetën me thikë nënës së tij 39-vjeçare, Meleqe Lusha, është zhvilluar brenda ambienteve të spitalit psikiatrik dhe jo në qeli. Ky vendim u mor menjëherë pas vlerësimeve specialistike të kryera nga mjekët. Përpara gjyqtarit hetues, i riu ka përsëritur dëshminë e dhënë më parë për organet e rendit, duke pranuar se është autori i vrasjes së të ëmës. Ai ka deklaruar gjithashtu se kishte tentuar t'i jepte fund jetës përpara se të ndërmerrte aktin e rëndë. Sipas raportimeve të mediave italiane, përgjigjet e tij lidhur me motivet që e shtynë drejt krimit makabër kanë qenë të paqarta dhe mjaft konfuze. Ngjarja e rëndë familjare ndodhi brenda banesës së tyre në zonën e Chiari-t, në Brescia të Italise, ku 21-vjeçari e goditi nënën e tij 10 herë me thikë. Pas kryerjes së krimit fatal, autori u largua me shpejtësi nga shtëpia me automjetin e tij, duke udhëtuar për rreth 10 orë me rrobat e mbuluara nga gjaku. Më pas, ai u paraqit vetë në polici ku bëri edhe rrëfimin e plotë të ngjarjes.