Nismë drejt ekonomisë së gjelbër: MINTI dhe Banka Botërore bashkojnë forcat për Eko-Parqet Industriale në Kosovë

Ministria e Industrisë, Ndërmarrësisë, Tregtisë dhe Inovacionit (MINTI), në partneritet me Bankën Botërore, do të zyrtarizojë një marrëveshje kyçe bashkëpunimi, e cila ka në fokus jetësimin dhe zhvillimin e Eko-Parqeve Industriale në Kosovë. Ky dakordësim strategjik synon të vendosë themelet për ngritjen e zonave industriale në përputhje me standardet më të larta të mbrojtjes së mjedisit. Përmes kësaj nisme, synohet njëkohësisht stimulimi i rritjes ekonomike dhe fuqizimi i konkurrueshmërisë së ndërmarrjeve vendëse në treg. Përmes këtij partneriteti pritet të hapen shtigje të reja për thithjen e investimeve, të modernizohet infrastruktura industriale, si dhe të nxitet përdorimi më efikas i burimeve natyrore dhe energjisë. Ngritja e Eko-Parqeve Industriale shihet si një hap mjaft domethënës drejt modernizimit të sektorit industrial në vend, duke gërshetuar zhvillimin ekonomik me ruajtjen e mjedisit dhe zbatimin e praktikave të ekonomisë së gjelbër. Bashkëpunimi dypalësh ndërmjet MINTI-t dhe Bankës Botërore pritet të ndikojë drejtpërdrejt në krijimin e një klime më të favorshme për bizneset, si dhe në avancimin e mëtejshëm të politikave për zhvillim të qëndrueshëm industrial në Kosovë.