Tragjedia në Chiari: 21-vjeçari shqiptar rrëfen vrasjen e nënës pas 10 orësh arrati

Në repartin e psikiatrisë të spitalit ku po mbahet nën vëzhgim mjekësor, 21-vjeçari Eduart Xhani ka pranuar para autoriteteve vrasjen e nënës së tij, 39-vjeçares Meleqe Lusha. Ngjarja e rëndë, e cila tronditi komunitetin shqiptar në Chiari të Brescias, pasoi një periudhë arratie të të riut, i cili pas krimit kishte tentuar fillimisht t'i jepte fund edhe jetës së tij, por pa sukses. Sipas informacioneve nga hetimet, motivi i këtij akti mbetet ende një mister i plotë. Dëshmitë e dhëna nga i riu gjatë marrjes në pyetje kanë qenë konfuze dhe të paqarta, fakt që detyroi autoritetet ta transferojnë atë nga burgu drejt një strukture spitalore për vlerësime të thelluara psikologjike. Eduart Xhani, i cili punonte si kamerier në një rrjet restorantesh në Rovato, ishte fëmija i vetëm i familjes dhe njihej për natyrën e tij të mbyllur. Detajet e krimit janë makabre: gjithçka ndodhi rreth orës 21:00 në ambientet e kuzhinës së banesës së tyre. Sipas rindërtimit të ngjarjes, pa asnjë konflikt të mëparshëm apo debat të dukshëm, 21-vjeçari ka marrë një thikë dhe ka qëlluar për vdekje nënën e tij, duke i shkaktuar plagë fatale në fytyrë dhe kraharor. Pas kryerjes së aktit, i riu, i cili nuk kishte asnjë precedent të mëparshëm penal, u largua nga banesa. Për dhjetë orë me radhë, ai ka qarkulluar me automjetin e tij tip 'Audi' nëpër zonat e Brescias dhe Kremonës, në një gjendje të rënduar psikologjike dhe me rrobat e njollosura nga gjaku. Udhëtimi i tij i dëshpëruar mori fund të nesërmen, rreth orës 07:00, kur u shfaq para kazermës së karabinierëve në Kremona. Pavarësisht se drejtonte automjetin me patentë të pezulluar, ai nuk hezitoi të dorëzohej sapo një efektiv doli për ta pritur, duke i thënë thjesht: 'Kam vrarë mamin tim'.