Sukses historik në volejboll: Erjona Jonuzi kualifikohet me Sllovan Bratislavën në fazën e 16-shes së Challenge Cup

Volejbollistja shqiptare nga Maqedonia e Veriut, Erjona Jonuzi, ka shkruar histori me klubin e saj, Sllovan Bratislava, duke siguruar kalimin në fazën kryesore të kompeticionit prestigjioz evropian, Challenge Cup. Skuadra sllovake arriti të sigurojë një vend mes 16 ekipeve më të mira të turneut pasi mposhti në dy përballje ekipin malazez, Buduçnosti nga Podgorica. Ky kualifikim shënon një arritje të rëndësishme për historinë e klubit nga Bratislava. Pas fitores së pastër 3:0 në duelin e parë të zhvilluar në shtëpi, volejbollistet e Sllovanit u përballën me një rezistencë të fortë në ndeshjen e kthimit në Podgoricë. Megjithatë, ato arritën të triumfojnë pas një drame në pesë sete, me rezultatin 3:2 (25:23, 16:25, 16:25, 25:21, 17:15). Erjona Jonuzi ishte pjesë aktive e gjithë takimit në Podgoricë, duke dhënë kontributin e saj me pesë pikë, nga të cilat tri përmes sulmeve dhe dy përmes bllokimeve, duke ndihmuar në këtë sukses të rëndësishëm. Në fazën e ardhshme, ku do të garojnë 16 skuadrat më të mira, Jonuzi dhe bashkëlojtaret e saj do të kenë përballë ekipin çek, LVI Pragë.