Sveçla në takim me homologen lituaneze: Partneriteti mes dy vendeve forcohet drejt integrimit evropian

Në kuadër të Forumit Ministror BE – Ballkani Perëndimor për Drejtësinë dhe Çështjet e Brendshme, i cili po zhvillohet në Budvë, ministri i Punëve të Brendshme të Kosovës, Xhelal Sveçla, ka zhvilluar një takim dypalësh me zëvendësministren e Brendshme të Lituanisë, Ana Burkovskiene. Në fokus të bisedimeve ishte intensifikimi i bashkëpunimit ndërmjet dy shteteve mike. Gjatë këtij takimi, ministri Sveçla shprehu mirënjohjen e tij për mbështetjen e vazhdueshme që Lituania i ofron Kosovës, duke vlerësuar veçanërisht pjesëmarrjen e trupave ushtarake lituaneze në misionin e KFOR-it. Ai nënvizoi se Lituania vazhdon të jetë një aleate e palëkundur e Kosovës në procesin e saj të integrimit në familjen evropiane. Sveçla bëri të ditur përmes një njoftimi se gjatë bashkëbisedimit u identifikuan sfida të përbashkëta në fushën e sigurisë, duke shtuar se palët diskutuan mbi mekanizmat për bashkërendimin e veprimeve me qëllim adresimin dhe tejkalimin e këtyre sfidave në mënyrë efikase. Ndërkaq, marrja e Presidencës së Këshillit të Bashkimit Evropian nga ana e Lituanisë, duke filluar nga 1 janari i vitit 2027, u vlerësua nga ministri Sveçla si një mundësi e shkëlqyer për të hapur kapituj të rinj në avancimin e mëtejshëm të marrëdhënieve bilaterale mes Kosovës dhe Lituanisë.