Tragjedi në Brooklyn: Zjarri masiv shuan gjashtë jetë dhe lë pas dhjetëra të lënduar

Një ngjarje e rëndë ka tronditur qytetin e Nju Jorkut, ku një zjarr shkatërrues që përfshiu një ndërtesë banimi në Brooklyn ka lënë pas gjashtë viktima dhe disa persona të tjerë të lënduar. Flakët kanë nisur në orët e para të mëngjesit të së enjtes, duke shkaktuar një reagim të gjerë të ekipeve të emergjencës. Departamenti i Zjarrfikësve të Nju Jorkut (FDNY) njoftoi se alarmi për zjarrin në afërsi të lagjes Sunset Park është dhënë rreth orës 01:40 pas mesnate. Në operacionin e vështirë të shpëtimit janë angazhuar më shumë se 230 zjarrfikës dhe personel ndihmës, të cilët u përballën me flakë që kishin përfshirë katin e parë dhe të dytë të objektit. Bilanci tragjik u konfirmua nga autoritetet: katër persona humbën jetën në vendngjarje, ndërsa një burrë dhe një grua ndërruan jetë pas dërgimit në spital. Përveç viktimave, gjashtë qytetarë të tjerë kanë pësuar lëndime, ku dy prej tyre ndodhen në gjendje kritike për jetën. Gjithashtu, tre zjarrfikës kanë mbetur të lënduar gjatë përpjekjeve për të vënë situatën nën kontroll. Kryebashkiaku i Nju Jorkut, Zoran Mamdani, ka shprehur ngushëllimet dhe pikëllimin e thellë për këtë humbje jetësh, duke u bërë thirrje qytetarëve që të bashkohen në lutje për shërimin sa më të shpejtë të të mbijetuarve që po marrin trajtim mjekësor. Hetuesit po punojnë për të zbardhur shkaqet e zjarrit. Në vendngjarje është dërguar edhe një njësi speciale për materiale të rrezikshme, për shkak të identifikimit të një baterie litium-jon në zonën ku shpërthyen flakët, ndonëse ende nuk është konfirmuar nëse ky element ka qenë shkaktari kryesor i tragjedisë.