Nata e 13-të e protestës “Jo në emrin tim”: Aktivitetet dhe detajet e mbrëmjes në sheshin “Skënderbeu”

Protesta qytetare e njohur me moton “Jo në emrin tim” do të mbajë sonte edicionin e saj të 13-të radhazi. Tubimi, i cili po zhvillohet në sheshin “Skënderbeu” në Prishtinë, pritet të bashkojë sërish qytetarët, ndërsa në listën e folësve spikat emri i aktorit të njohur, Kushtrim Sheremeti. Axhenda e mbrëmjes do të çelet me interpretimin e “Betimit të Ushtarit” nga veterani Bekim Juniku. Më pas, skena do t’u takojë organizatorit të protestës, Çlirim Hazirit, gazetares nga Shqipëria, Denada Kola, si dhe aktorit Kushtrim Sheremeti, të cilët do të ndajnë mesazhet e tyre me të pranishmit. Pjesë e programit do të jetë edhe shfaqja e videos “Rrëfimi i ushtarit” në ekranin LED, ndërsa veterani Bekim Juniku do të paraqesë për publikun dëshminë e tij personale. Atmosfera do të përcillet edhe përmes vargjeve për Epopenë e Jezercit të interpretuara nga Luan Jahiri, si dhe performancës së një kënge ushtarake. Gjatë këtij organizimi, protestuesit do të zhvillojnë edhe një aksion simbolik të titulluar “Një minutë heshtje për drejtësinë”. Nisja e këtij aktiviteti është parashikuar të bëhet në orën 21:00, në qendër të kryeqytetit.