Manchester United hedh sytë nga Didier Deschamps për postin e trajnerit

Gjiganti anglez, Manchester United, ka nisur lëvizjet konkrete për gjetjen e një pasuesi në krye të pankinës, duke vendosur kontakte zyrtare me strategun francez, Didier Deschamps. Drejtuesit e klubit nga “Old Trafford” po vlerësojnë opsione të ndryshme për të zëvendësuar Michael Carrick, i cili aktualisht ndodhet nën një presion të shtuar dhe rrezikon seriozisht shkarkimin për shkak të rezultateve të fundit. Megjithatë, rruga drejt emërimit të Deschamps duket e vështirë. Burime të afërta me teknikun francez bëjnë të ditur se ai nuk është tërësisht i bindur nga projekti aktual dhe situata e paqëndrueshme që po kalon skuadra e “Djajve të Kuq”. Ndonëse Deschamps mbetet i hapur për të dëgjuar oferta të reja, ai nuk dëshiron të marrë vendime të nxituara. Sipas informacioneve të fundit, fituesi i Kupës së Botës preferon që të presë deri në mbyllje të këtij sezoni, me synimin për t'u rikthyer në zejen e trajnerit vetëm gjatë merkatos së verës së ardhshme.